Белгия Гулнора Каримова иши бўйича мусодара қилинган 108 миллион долларни Ўзбекистонга топширади
Бу маблағлар Ўзбекистон ҳуқуқ-тартибот идоралари томонидан бошланган коррупция ва жиноий даромадларни легаллаштиришга оид тергов доирасида музлатиб қўйилди.
Қайд этилишича, бу маблағлар ниҳоят давлат фойдасига мусодара қилинди.
Аввалроқ Брюссел прокуратурасига телекоммуникатсия соҳасида шартномалар тузишда коррупция ва пул ювиш ҳолатлари бўйича тергов доирасида Ўзбекистон адлия органларидан халқаро ҳуқуқий ёрдам сўрови келиб тушган.
Ушбу халқаро мандат доирасида БМТнинг Коррупцияга қарши конвенцияси асосида Белгияда Ўзбекистон расмийлари талаби билан 200 миллион долларлик активлар ҳибсга олинди.
Кейинчалик бу сумма ҳисобланган фоизлар билан бирга ниҳоят суд қарори билан мусодара қилинди. Суд мусодара қилинган мол-мулк Европа Иттифоқига аъзо давлатлар ўртасида амалда бўлган ҳуқуқий механизмга мувофиқ икки давлат ўртасида тақсимланиши керак, деган қарорга келди. Ушбу қарорга кўра, Ўзбекистонга 108 миллион доллар ўтказилади.