Ноқонуний фирмалар сабаб Саудия Арабистонида қолиб кетган “Умра” зиёратчилар Ўзбекистонга қайтарилди

600 га яқин фуқаролар Саудия Арабистонида оч ва ётоқсиз қолиб кетишган.

Маълум қилинишича, жорий йилнинг 3 ойи давомида туристик компания ниқоби остида фаолият юритиб, ҳеч қандай лицензиясиз «Умра» сафарларини ташкил этиш ортидан 34 та жиноят иши қўзғатилиб, 46 нафар шахслар жиноий жавобгарликка тортилди.

53 та туристик хизмат кўрсатувчи субъектлар фаолияти тўхтатилди.

“Тур фирмалар ўзининг зиммасидаги вазифаларни тўлақонли бажармаганлиги учун кўп фуқароларимиз сарсон бўлиб, ўша жойларда неча кунлаб оч ва ётоқсиз қолиб кетишди”,- дейди Мусулмонлар идораси раиси ўринбосари Зайниддин Эшонқулов.

Ўзбекистон Республикасидан зиёрат мақсадида Саудия Арабистонига кетиб, тадбиркорларнинг ноқонуний хатти-ҳаракатлари ортидан оғир аҳволда қолиб кетган жами 580 нафар фуқаролар чартер рейс орқали Ўзбекистонга олиб келинган.

“Ўзи муаммолар аэропортдан бошланган эди. Борганимиздан кейин ҳам ҳаммамиз битта хонада қолдик. Мадинага ҳам олиб боришмади. Элликбоши бўлмади”,- дея изоҳлади жабрланувчилар.