Ўзбекистон ва Туркия ўзаро муносабатлар мақомини «кенг қамровли стратегик шериклик» босқичига олиб чиқади

Ўзбекистон ва Туркия президентлари икки давлат ўртасидаги муносабатлар мақомини «кенг қамровли стратегик шериклик» босқичига кўтаришга келишиб олди. Музокаралар якунида 10 та ҳужжат, шу жумладан, имтиёзли савдо, мудофаа соҳасида ҳамкорлик ва маҳкумларни топшириш тўғрисидаги битимлар имзоланди. Шунингдек, Режеп Таййип Эрдоған Шавкат Мирзиёевни Туркияга таклиф қилди (фото).

29 март куни Кўксаройда Туркия президентларини расмий кутиб олиш маросими бўлиб ўтди. Бу ҳақда Ўзбекистон президенти матбуот хизмати хабар берди.

Шавкат Мирзиёев ва Режеп Таййип Эрдоған шоҳсупага кўтарилгач, Ўзбекистон ва Туркия давлат мадҳиялари янгради.

Фахрий қоровул ўзининг янги ҳарбий либосида тантанали равишда давлат раҳбарлари олдидан саф тортиб ўтди.

Шундан сўнг, икки давлат раҳбарлари мамлакатларнинг расмий делегациялари аъзолари билан кўришишди.

Тор доирадаги учрашув

Ташрифнинг асосий қисми — Шавкат Мирзиёев ва Режеп Таййип Эрдоғаннинг тор доирадаги музокаралари бўлиб ўтди.

«Газета.uz»да реклама

Етакчилар Ўзбекистон ва Туркия ўртасидаги ўзаро ҳурмат, дўстлик ва ишончга асосланган кўп қиррали ҳамкорликни янада ривожлантириш ва мустаҳкамлаш юзасидан фикр алмашди, дейилади хабарда.

Учрашувда асосий эътибор стратегик шериклик муносабатлар даражасини юксалтириш, икки мамлакат ўртасидаги сиёсий, парламентлараро, савдо-иқтисодий ва маданий-гуманитар алоқаларни кенгайтириш масалаларига қаратилди.

Кейинги йилларда икки томонлама ҳамкорлик сезиларли даражада фаоллашди. Ҳукуматлар, вазирлик ва идоралар, ҳудудлар даражасида доимий мулоқотлар йўлга қўйилган. Олий даражада эришилган келишувлар изчил амалга оширилмоқда.

Шунингдек, Давлат раҳбарлари минтақавий ва халқаро кун тартиби юзасидан фикр алмашар эканлар, мамлакатларнинг позициялари ўхшаш эканини қайд этган. Кўп томонлама халқаро институтлар доирасидаги икки томонлама ҳамкорликни давом эттиришга келишиб олинди.

Ўзбекистон-Туркия Стратегик ҳамкорлик кенгашининг иккинчи йиғилиши

Тор доирадаги учрашув олий даражадаги Ўзбекистон-Туркия Стратегик ҳамкорлик кенгашининг иккинчи йиғилишига уланиб кетди.

Ўзбекистон президенти Шавкат Мирзиёев Туркия етакчисини қутлар экан, ўзаро ҳамкорликда юксак даражага эришилганидан, мамлакатлар парламентлари, давлат идоралари, ишбилармон доиралари ва жамоатчилиги ўртасидаги алоқалар мустаҳкамланиб бораётганидан мамнун эканлигини билдирди.

Давлат раҳбари Ўзбекистон кўп қиррали муносабатларни янада ривожлантириш ва мустаҳкамлашдан манфаатдор эканини таъкидлади.

Туркия президенти Режеп Таййип Эрдоған мамлакатларнинг қардошлик ришталарига асосланган стратегик шериклиги барча соҳаларда ўзаро ишонч ва ҳурмат руҳида ривож топаётганини алоҳида қайд этди.

Етакчилар жорий йилда икки давлат ўртасида дипломатик муносабатлар ўрнатилганининг 30 йиллиги ва стратегик шериклик муносабатлари йўлга қўйилганининг 5 йиллиги нишонланаётганини мамнуният билан таъкидладилар.

Икки мамлакат етакчиларининг расмий ташрифлари ва мунтазам мулоқотлари сиёсий мулоқотни мустаҳкамлашга хизмат қилиб, сермаҳсул амалий шериклик учун кенг имкониятлар очди.

Савдо ва инвестиция соҳаларида алоқалар жадал ривожланмоқда. Жумладан, кейинги йилларда ўзаро товар айирбошлаш 2,5 баробарга ўсиб, 3,6 миллиард доллардан ошди. Қўшма корхоналар сони 5 баробар кўпайиб, 2 мингдан ортди. Инвестициявий ҳамкорлик кўрсаткичлари 70 баробарга ўсди, дейилади хабарда.

Икки томонлама ҳамкорликни янада ривожлантириш мақсадида томонлар шерикликни, шу жумладан савдо ва иқтисодиёт, инвестициялар, транспорт, тўқимачилик, энергетика, қишлоқ хўжалиги, маданий-гуманитар алмашинув каби соҳаларда янада кенгайтиришнинг устувор йўналишларига батафсил тўхталди.

Ўзбекистондаги ислоҳотлар борасида ҳамкорликни мустаҳкамлаш, давлат-хусусий шериклик механизмларини жорий қилиш, фан, таълим, санъат, кино, туризм ва ахборот соҳаларидаги шерикликни чуқурлаштиришга келишиб олинди.

Йиғилиш якунида Ўзбекистон ва Туркия ўртасидаги ҳамкорликни янги босқичга олиб чиқувчи муҳим ҳужжатлар имзоланиши таъкидланди. Преференциал савдо тўғрисида, қурилиш, соғлиқни сақлаш, адлия, божхона ва бошқа соҳалардаги ҳамкорликни ривожлантириш бўйича келишувлар шулар жумласидан.

Олий даражадаги Ўзбекистон-Туркия Стратегик ҳамкорлик кенгаши йиғилиши қарорларини амалга ошириш бўйича қўшма «йўл харитаси»ни қабул қилиш режалаштирилган.

Ҳамкорлик кўлами кенгайганини ҳисобга олиб, томонлар икки томонлама муносабатларни янги даражага — кенг қамровли стратегик шериклик босқичига олиб чиқишга қарор қилди.

«Анадолу» хабар беришича, Режеп Эрдоған кенгаш йиғилишини икки йилда бир маротаба эмас, балки ҳар йили ўтказишни таклиф қилди.

Унинг сўзларига кўра, ўтган йил якунларига кўра, Туркия ва Ўзбекистон ўртасида икки томонлама товар айланмаси 3,6 млрд долларга етиб, бу кўрсаткич 72 фоизга ўсган. У шунингдек, томонлар биринчи босқичда 5 млрд долларга, кейинчалик эса 10 млрд долларгача кўратиришни мақсад қилганини таъкидлади.

Музокаралар якунида Режеп Таййип Эрдоған Шавкат Мирзиёевга икки томонлама Стратегик ҳамкорлик кенгашининг навбатдаги йиғилишида иштирок этиш учун Туркияга ташриф билан келишни таклиф этди.

Ҳужжатларни алмашиш маросими

Олий даражадаги музокаралар якунлангач, ҳужжатларни имзолаш ва алмашиш маросими бўлиб ўтди.

Ўзбекистон президенти Шавкат Мирзиёев ва Туркия президенти Режеп Таййип Эрдоған олий даражадаги Стратегик ҳамкорлик кенгашининг иккинчи йиғилиши якунлари бўйича Қўшма баёнот имзолади.

Бундан ташқари, икки мамлакат ҳукуматлари, вазирлик ва идоралари даражасида кўп қиррали Ўзбекистон-Туркия ҳамкорлигини янада кенгайтиришга қаратилган 9 та ҳужжат имзоланди.

Жумладан ҳар икки томон вакиллари қуйидаги ҳужжатларни алмашди:

• Имтиёзли савдо тўғрисидаги битим;
• Давлат чегаралари орқали товарлар ва транспорт воситаларининг ўтиши ҳақида олдиндан ахборот алмашиш тўғрисидаги баённома;
• Меҳнат ва бандлик соҳасида ҳамкорлик тўғрисидаги англашув меморандуми;
• Қурилиш соҳасида англашув меморандуми;
• соғлиқни сақлаш вазирликлари ўртасида 2022−2023 йилларга мўлжалланган Ҳаракатлар режаси;
• Ўзбекистон Миллий ахборот агентлиги билан Туркиянинг «Анадолу» агентлиги ўртасида Ҳамкорлик битими.

Бундан ташқари, Ўзбекистон24 телеканали тайёрлаган репортажда яна икки ҳужжат тилга олинган.

Улардан бири Ҳарбий ҳадли ҳукуматлараро битим — Ўзбекистон мудофаа вазири Баҳодир Қурбонов (суратда ўнгда) ва Туркия миллий мудофаа вазири Хулуси Акар (суратда чапда) томонидан алмашилган.

Фото: Ўзбекистон24 видеосидан лавҳа.

Ўзбекистон адлия вазири Русланбек Давлетов (суратда ўнгда) ва Туркия адлия вазири Бекир Бўздағ (суратда чапда) эса Маҳкумларни топшириш тўғрисидаги ҳукуматлараро битим ва Адлия вазирликлари ўртасида суд-экспертизаси соҳасида ҳамкорлик меморандумини алмашди.