Ўзбекистон ва Қирғизистон транспорт вазирлари Хитой-Қирғизистон-Ўзбекистон темир йўли қурилишини кўздан кечиради

28–29 июль кунлари Ўзбекистон транспорт вазири Илҳом Маҳкамов ва Қирғизистон транспорт ва коммуникациялар вазири Талантбек Солтобоев Қирғизистон ҳудудида барпо этилаётган Хитой — Қирғизистон — Ўзбекистон темир йўлининг асосий қурилиш объектларига ташриф буюради.

Ишчи ташриф давомида вазирлар туннеллар, кўприклар ва бошқа инфратузилма объектларидаги қурилиш ишлари билан танишади. Шунингдек, лойиҳани амалга ошириш суръати, олдинда турган вазифалар ҳамда қурилишни ўз вақтида ва сифатли якунлаш чора-тадбирлари муҳокама қилинади.

Хитой — Қирғизистон — Ўзбекистон темир йўли минтақадаги энг йирик инфратузилма лойиҳаларидан бири ҳисобланади. Янги темир йўл уч давлат ўртасидаги транспорт алоқаларини мустаҳкамлаши, минтақа транзит салоҳиятини ошириши ҳамда янги халқаро транспорт йўлагининг муҳим қисмига айланиши кутилмоқда.