Тошкент аэропортида 4,4 килограмм синтетик гиёҳванд модда мусодара қилинди

Тошкент халқаро аэропортида 4,4 килограмм «Мефедрон» синтетик гиёҳванд моддасини мамлакатга олиб киришга бўлган уринишнинг олди олинди. Бу ҳақда Давлат хавфсизлик хизмати маълум қилди.

Маълум қилинишича, «Хавфсиз ва соғлом юрт» тезкор-профилактик тадбирлари доирасида Давлат хавфсизлик хизмати ходимлари «Тошкент-Аэро» ихтисослаштирилган божхона комплекси билан ҳамкорликда тезкор-қидирув тадбирларини ўтказган.

Текширув давомида «Бангкок – Шаржа – Тошкент» авиақатнови орқали келган 1994 йилда туғилган Қозоғистон Республикаси фуқаросининг қўл юклари кўздан кечирилди. Натижада саккизта турли ширинликлар қадоғи ва бешта пластмасса идиш ичида жами 4,4 килограмм «Мефедрон» синтетик гиёҳванд моддаси борлиги аниқланди.

Тезкор тадбирнинг кейинги босқичида интернет орқали фаолият юритган наркотик савдоси тармоғи бошқарувчисининг топшириғига кўра, ушбу моддани Тошкент шаҳридаги меҳмонхоналардан бирида қабул қилиб олиш учун келган Янгийўл шаҳрида яшовчи, 2006 йилда туғилган шахс ҳам қўлга олинди.

Ҳуқуқни муҳофаза қилувчи органлар маълумотига кўра, ушланган маҳаллий фуқаро кўздан кечирилганда унинг ёнидан пневматик тўппонча ҳам топилган. Мазкур ашё процессуал тартибда расмийлаштириб олинган.

Ҳозирда ушбу ҳолат юзасидан тегишли тергов ҳаракатлари олиб борилмоқда.