Рамазон Темиров ва Богдан Гусков UFC Fight Night 282 қанча ишлаб топгани маълум бўлди

Бирлашган Араб Амирликларининг Абу-Даби шаҳрида бўлиб ўтган UFC Fight Night 282 турнири иштирокчиларининг кафолатланган гонорарлари маълум бўлди. Мусобақада қатнашган ўзбекистонлик жангчилар ўз чиқишлари орқали катта миқдордаги маблағларга эга чиқишди.

Турнирнинг марказий жангида россиялик собиқ UFC чемпиони Магомед Анкалаевга қарши октагонга кўтарилган ўзбекистонлик спортчи Богдан Гусков 381 минг доллар кафолатланган гонорарни қўлга киритди. Маълумот учун, Богдан ушбу жангга бор-йўғи 10 кун қолганида рози бўлган ва муносиб қаршилик кўрсатишига қарамай, бешинчи раундда техник нокаут билан имкониятни бой берган эди. Унинг рақиби Анкалаев эса бу жангдан 591 минг доллар ишлаб олди.

Кечанинг аҳамияти жиҳатидан иккинчи жангида ўзбекистонлик аралаш яккакураш устаси Рамазон Темиров ўз вазн тоифасида рейтингнинг 13-поғонасида бораётган Стив Эрсегни биринчи раунддаёқ даҳшатли нокаутга учратди. Ушбу ёрқин ғалабаси учун Рамазон 136 минг доллар кафолатланган гонорарга эга чиқди.

Бунинг устига, Темиров турнирдаги ягона нокаут қайд этгани учун ташкилот томонидан қўшимча 100 минг доллар бонус билан ҳам тақдирланди. Шу тариқа, Темиров UFCдаги ўзининг учинчи жангидан умумий ҳисобда 236 минг доллар ишлаб олди.

UFC Fight Night 282 турнири иштирокчиларининг тўлиқ гонорарлари:

Магомед Анкалаев — 591 000 доллар
Богдан Гусков — 381 000 доллар
Сантяго Понзиниббио — 271 000 доллар
Дастин Жейкоби — 266 000 доллар
Валтер Уокер — 178 000 доллар
Рамазон Темиров — 136 000 доллар
Ризван Куниев — 136 000 доллар
Тайрелл Форчун — 118 000 доллар
Стив Эрсег — 91 000 доллар
Майк Девис — 81 000 доллар
Нурулло Алиев — 54 500 доллар
Муҳаммад Саидов — 53 000 доллар
Магомед Зайнуков — 28 000 доллар
Магомед Тучалов — 28 000 доллар
Абубакар Вагаев — 28 000 доллар
Сайгид Изагахмаев — 18 000 доллар
Дамиан Ржепески — 16 000 доллар.