Россиянинг Ил-114-300 самолёти 40 даража иссиқликдаги синовлар учун Ўзбекистонга келди

Россияда ишлаб чиқилган тажриба намунаси ҳисобланган Ил — 114-300 минтақавий йўловчи самолёти юқори ҳарорат шароитида синовдан ўтказиш учун Ўзбекистонга келтирилди.

Самолёт Москва вилоятидан Бухорога қўнмасдан учиб келди. Бу ерда мутахассислар ҳаво ҳарорати 40 даражагача етадиган қуруқ иқлим шароитида унинг барча борт тизимлари ишлашини синовдан ўтказади.

Ил — 114-300 60 нафардан ортиқ йўловчини ташишга мўлжалланган бўлиб, минтақавий йўналишларда, жумладан, тупроқ учиш-қўниш йўлакларига эга аэропортларда ҳам фойдаланиш учун ишлаб чиқилган. Келгусида у босқичма-босқич эксплуатациядан чиқарилаётган Ан — 24 самолётлари ўрнини эгаллаши режалаштирилган.

Бундан аввал ушбу тажриба самолёти Якутияда ўта паст ҳарорат шароитида ҳам синовларни муваффақиятли якунлаган.