Фото: Ўзбекистон президенти Қирғизистондаги илк халқаро тоифадаги гольф-клуб очилишида иштирок этди

Ўзбекистон президенти Шавкат Мирзиёев пайшанба куни Марказий Осиё давлатлари ва Озарбайжон раҳбарлари билан бирга Иссиқкўл вилоятининг Қошкўл қишлоғида Қирғизистондаги биринчи халқаро тоифадаги гольф-клубнинг очилиш маросимида иштирок этди. Бу ҳақда Президент матбуот хизмати хабар қилди.

Давлат раҳбарлари бу ерда барпо этилган замонавий спорт ва туристик инфратузилма билан танишди. Янги мажмуа гольфни оммалаштириш ва спорт туризмини ривожлантиришга хизмат қилиши кутилмоқда.

«Ишонаманки, яқин келажакда ушбу гольф-клуб халқаро турнирларни ўтказиш бўйича энг нуфузли марказлардан бирига айланади ва Қирғизистонни жаҳон гольф харитасида танитишга муносиб ҳисса қўшади», — деди маросимда Қирғизистон президенти Садир Жапаров.

Тадбир якунида президентлар рамзий биринчи зарбани бериб, гольф-резортнинг расман очилганини эълон қилди.

Шавкат Мирзиёев давлат ташрифи билан Қирғизистонда бўлиб турибди. Шу куни у Қирғизистон президенти Садир Жапаров билан музокаралар ўтказди. Учрашув якунлари бўйича икки мамлакат ўртасида Иттифоқчилик муносабатлари тўғрисидаги шартнома имзоланди.

Фото