8992 нафар ҳоким ёрдамчиларининг барчаси вазифа бажарувчи этиб тайинланиб, қайта баҳоланади

Ўзбекистонда кредит, субсидия ва компенсация тақдим этиш шартларини аниқлаш тартиби ўзгартирилади. Уларни фармон ва қарорлар билан белгилаш амалиётидан воз кечиш режалаштирилмоқда. Бу ҳақда 3 сентябрь куни камбағалликни қисқартириш ва аҳоли даромадларини ошириш юзасидан ўтказилган видеоселекторда президент Шавкат Мирзиёев маълум қилди.

Энди Иқтисодиёт вазирлиги ва Марказий банк ҳудудлар салоҳиятидан келиб чиқиб, молиялаштириш механизмларини ҳар чоракда янгилаб боради.

Ўзгаришлар маҳаллалардаги ҳоким ёрдамчиларига ҳам тегишли бўлади. Туман штаблари уларни лойиҳабай ишлаш тизимига ўтказади. Бунинг учун 8992 та маҳалладаги ҳоким ёрдамчилари вазифа бажарувчи этиб тайинланади. Уларнинг ишлари баҳолангач, фидойи ва ташаббускор кадрлар лавозимига қайта тайинланиб, ишига нолойиқлар янгиланади.

Президент мутасаддиларга икки ойда ўқув маркази ташкил этиб, хориждан мутахассислар жалб қилиш вазифасини қўйди. Ушбу марказда ҳоким ёрдамчилари лойиҳабай ишлашга ўқитилади.

Вилоят штаблари йил якунида ҳар бир тумандан энг яхши икки нафар ҳоким ёрдамчисини Хитой, Япония ва Туркияга малака оширишга юборади.

Энг намунали ҳоким ёрдамчиларига алоҳида малака даражаси берилиб, 50 фоизгача устама тўланади.

Маҳалла банкирларини ҳам шу тартибда ўқитиш ва уларнинг хорижий стажировкасини ташкил этиш топширилди.

Бош прокуратурага банкирлар ва ҳоким ёрдамчиларининг мустақил қарор қабул қилишига тўсқинлик қилаётган омилларни бартараф этишга кўмаклашиш вазифаси белгиланди.

Йиғилишда жойлардаги тадбиркорлик инфратузилмаси лойиҳаларини юритиш тизими ҳам қайта кўриб чиқилиши маълум қилинди.

Ҳозир бу масалалар асосан вилоят даражасида ҳал қилинаётгани ишларнинг чўзилишига сабаб бўлаётгани қайд этилди. Туманни лойиҳаларнинг буюртмачисига айлантириш ва маблағларни бевосита жойларга йўналтириш ишларни тезлаштириши таъкидланди.

Оғир маҳаллаларда иш ўрни яратишга қаратилган маҳаллий маблағларга республикадан 2−3 карра кўп ресурс қўшиб бериш таклиф қилинди.

Энди тадбиркорлик инфратузилмаси учун туманга бериладиган маблағлар ҳисобидан лойиҳа ишлаб чиқишга туман штаби раҳбари масъул бўлади.

Туман штабига лойиҳалаш, қурилиш ва сифат назоратини хусусий секторга беришга рухсат этилади. Шу билан бирга, штаб раҳбари объектларни белгиланган муддат ва сифат талаблари асосида фойдаланишга топширилиши учун жавобгар бўлади.