Жиззах вилоятида неолит даврига оид манзилгоҳлар ва қадимги қоя тош суратлари аниқланди

Жиззах вилоятида ўтказилган археологик тадқиқотлар давомида олимлар илгари маълум бўлмаган неолит даврига оид манзилгоҳлар ҳамда одамлар, ҳайвонлар ва турли рамзлар тасвирланган 30 га яқин қадимги петроглифларни (қоя тош суратларини) топдилар. Ушбу кашфиёт Ўзбекистон Маданий мерос агентлиги ва Самарқанд археология институти мутахассислари томонидан амалга оширилди ва бу ҳақда Британиянинг «Heritage Daily» илмий онлайн нашри хабар берди.

Нисбатан кичик ҳудудда неолит даврига оид манзилгоҳларнинг топилиши Зомин воҳаси қадимги инсонлар томонидан фаол ўзлаштирилганини ва кейинчалик (тахминан 3 минг йил аввал) бу ерда ўзбек давлатчилиги шаклланиши жараёнлари бошланганини кўрсатади.