Саида Мирзиёева Ўзбекистон ва АҚШ ўртасидаги инвестициявий ҳамкорликнинг янги истиқболлари ҳақида маълум қилди

Тошкентда Ўзбекистон Президенти Шавкат Мирзиёев ва АҚШ Давлат котиби Марко Рубио иштирокида Америка–Ўзбекистон бизнес ва инвестиция кенгашининг йиғилиши бўлиб ўтди. Бу ҳақда Саида Мирзиёева ўз саҳифасида хабар берди.

Унинг сўзларига кўра, йиғилишда 100 дан ортиқ АҚШ компаниялари вакиллари иштирок этди. Томонлар инвестицияларни жалб қилиш, бизнесни ривожлантириш ва қўшма лойиҳаларни амалга ошириш учун янги имкониятларни муҳокама қилдилар.

Саида Мирзиёева билдирилган ишонч ва Ўзбекистон ҳамда АҚШ ўртасидаги иқтисодий ҳамкорлик истиқболларини кенгайтиришга қаратилган кенгаш ташкил этилгани учун давлат раҳбарига миннатдорлик билдирди.

У, шунингдек, Марко Рубио, унинг рафиқаси Жанетт ва Серджио Горга ушбу ташаббусни қўллаб-қувватлаганликлари, Ўзбекистонга кўрсатилган эътибор ҳамда икки томонлама шерикликни ривожлантиришга тайёр эканликлари учун алоҳида ташаккур айтди.

Мирзиёеванинг таъкидлашича, эришилган келишувларни амалий рўёбга чиқариш кейинги муҳим қадам бўлиши керак.

«Энди келишувлар ортидан реал ишлар: янги инвестициялар, корхоналар ва иш ўринлари пайдо бўлиши муҳимдир», — деб таъкидлади у.

Саида Мирзиёева айнан шундай натижалар Ўзбекистоннинг Америка Қўшма Штатлари билан иқтисодий ҳамкорлигини мустаҳкамлашдан кўзланган асосий мақсад эканини урғулади.