Баҳриддин Рўзиев 1950 йил 23 августда Қашқадарё вилоятининг Чироқчи туманида туғилган. Меҳнат фаолиятини Кармана тумани йўл қурилиши бирлашмасида автослесарь сифатида бошлаган. Кейинчалик Тошкент политехника институтининг муҳандис-механик мутахассислиги бўйича ҳамда Москвадаги Ижтимоий фанлар академиясида таҳсил олган.

У турли йилларда ёшлар ташкилотлари ва Навоий вилояти давлат бошқаруви органларида масъул лавозимларда ишлаган. Вилоят газлаштириш бошқармаси ва ҳудудий коммунал хизмат кўрсатиш бошқармасига раҳбарлик қилган, Конимех тумани ҳокими бўлган.

2002 йилда Баҳриддин Рўзиев Навоий вилояти ҳокими этиб тайинланган. Ушбу лавозимда саноатни ривожлантириш, инвестицияларни жалб қилиш, фермер хўжаликларини қўллаб-қувватлаш ва ҳудуднинг экспорт салоҳиятини ошириш масалалари билан шуғулланган.

Унинг фаолиятидаги муҳим йўналишлардан бири «Навоий» эркин индустриал-иқтисодий зонаси ҳамда Навоий аэропорти негизида халқаро логистика марказини ташкил этиш бўлган.

Сўнгги йилларда ҳам Баҳриддин Рўзиев жамоат ишларида фаол иштирок этиб, фахрийлар ташкилотида ишлаган, турли жамоат тадбирларида қатнашган ва ёш мутахассисларга ўз тажрибасини ўргатган.

Унинг вафоти муносабати билан Ўзбекистон Президенти Шавкат Мирзиёев, Олий Мажлис Сенати раиси Танзила Норбоева, Қонунчилик палатаси спикери Нуриддин Исмоилов, Бош вазир Абдулла Арипов ҳамда бошқа давлат ва жамоат арбоблари таъзия билдирдилар.

Баҳриддин Рўзиевнинг ёрқин хотираси уни танigan ва у билан бирга ишлаган инсонлар қалбида сақланиб қолади.