Вазият тўлиқ назоратга олинди — Қорақалпоғистон коменданти

Якшанба куни Шавкат Мирзиёев Нукус шаҳрида видеоселектор ўтказди ва барча туманлар билан мулоқот қилди. Йиғилишда Қорақалпоғистон коменданти Рустам Жўраев вазият тўлиқ назоратга олинганини таъкидлади. «Вазият барқарорлашган, ҳаёт ўз маромига қайтмоқда», — дейилади хабарда.

Президент Шавкат Мирзиёев Қорақалпоғистон Республикасининг Нукус шаҳрида бўлиб турибди, деб хабар берди унинг матбуот котиби Шерзод Асадов.

Якшанба куни тонгда видеоселектор йиғилиши ўтказилиб, барча туманлар билан мулоқот қилинди. Туман ҳокимлари ва ҳуқуқни муҳофаза қилувчи органлар раҳбарлари фуқароларнинг хавфсизлигини таъминлаш, қонунийлик ва ҳуқуқ-тартиботни мустаҳкамлаш бўйича кўрилаётган чора-тадбирлар юзасидан ахборот берди.

Миллий гвардия қўмондони, Қорақалпоғистон коменданти Рустан Жўраев ҳамда мудофаа вазири Баҳодир Қурбонов.

«Газета.uz»да реклама

Таъкидланишича, давлат раҳбарининг кечаги мурожаатидан кейин «вазият барқарорлашган, ҳаёт ўз маромига қайтмоқда».

«Йиғилишда Қорақалпоғистон Республикаси ҳудудининг коменданти ушбу ҳолат бўйича ахборот бериб, вазият тўлиқ назоратга олинганини таъкидлади», — дейилади хабарда.

Шундан сўнг, давлат раҳбари Нукус шаҳридаги Жекетерак маҳалласи аҳолиси билан учрашди.

Жекетераклик ёшуллилар кечаги кўнгилсиз воқеаларда баъзи ёшлар адашгани ва қонунга зид ҳаракатлар содир этгани, ташқи ғаразли кучлар таъсирига тушиб, ҳис-ҳаяжонга берилганини афсус билан айтишди, дейилади хабарда.

Шунингдек, ўзбеклар ва қорақалпоқлар икки тилли бир эл экани, мамлакат бирлиги ва тинчлигини қадрига етиш кераклиги таъкидланди.

Эслатиб ўтамиз, шанба куни президент фармони билан Қорақалпоғистонда 2 августга қадар фавқулодда ҳолат жорий этилиб, 21:00 дан соат 7:00 га қадар бўлган муддатда комендантлик соати ўрнатилганди.