«Мурожаатсиз пенсия тайинлаш тизимини киритмоқчимиз» — Русланбек Давлетов
Яқин бир йил ичида ёшга доир пенсияни тайинлашни фуқароларнинг мурожаатисиз амалга ошириш режалаштирилмоқда. Бу ҳақда Русланбек Давлетов Қонунчилик палатасининг 20 июль кунги мажлисида маълум қилди.
«Ёшга доир пенсияни тайинлашда ҳам давлат ўзининг мажбуриятини тўғри ҳис қилиб, биз мурожаатсиз пенсия тайинлаш тизимини киритмоқчимиз. Чунки жуда кўп инсонлар ишлайди, давлат ва жамиятга қанча хизмат қилади, умрини охирги босқичлари келганида бюрократияда қийналиб, баҳслашиб [юради]», — деди у.
Унинг сўзларига кўра, агар ҳозир судлар фаолияти таҳлил қилинса, пенсия низоларига доир ишлар жуда кўп.
«Аслида бундай бўлмаслиги керак. Пенсия бўйича ҳеч қандай низолар қолмаслиги керак, чунки йил ишлаганидан кейин давлат тегишли имкониятларни яратиб бериши керак», — деди вазир.
«Ҳар қандай ноаниқликлар пенсия олувчининг фойдасига талқин қилиниши керак. Мана шу тизимга бир йилда ўтишга ҳаракат қиламиз. Молия вазирлиги бу ерда асосий ижрочи, жуда яхши жамоа шаклланган, [буни] биргаликда амалга оширамиз», — деди Русланбек Давлетов.
Эслатиб ўтамиз, вазир айни шу мажлисда нотариусларга никоҳни рўйхатдан ўтказиш ҳуқуқини бериш ташаббусини ҳам билдирганди. Адлия вазири Русланбек Давлетовнинг ишонтиришича, «нотариуслар икки томоннинг хоҳиш-иродасини тасдиқлаб, шаҳодатлай олади».