Шахмат: Вакилларимиз ЖЧда муддатидан олдин кейинги босқичга йўл олишди

Айни кунларда Исроил давлатида шахмат бўйича ФИДE жамоалар ўртасидаги жаҳон чемпионати давом этмоқда.

Унда Ўзбекистон терма жамоаси ГМ Нодирбек Яккуббоев, ГМ Жавоҳир Синдаров, ГМ Шамсиддин Воҳидов, ГМ Жаҳонгир Воҳидовлардан иборат квартет билан Б гуруҳида саралаш раундларини ўтказмоқда.

Кеча, 21 ноябрь куни мусобақада 3 ва 4-тур баҳслари ўтказилди. Барча турларда қайд этилган натижалар билан танишинг:

1-тур: Ўзбекистон 1.5 — 2.5 Озарбайжон.
2-тур: Ўзбекистон 2.5 — 1.5 Исроил.
3-тур: Ўзбекистон 2.5 — 1.5 АҚШ.
4-тур: Ўзбекистон 3.5 — 0.5 Ҳиндистон.

4-тур якунига кўра 6 очко жамғарган термамиз «B» гуруҳда етакчига айланди ва муддатидан олдин кейинги босқич масаласини ҳал қилди.

Энди 5-турда ҳамюртларимиз Полша жамоасига қарши дона суради.

Маълумот учун, 5 та тур якунига кўра, «А» ва «B» гуруҳда энг яхши натижа қайд этган 4 тадан жамоа чорак финал босқичида иштирок этиш ҳуқуқига эга бўлади.

Манба: minsport.uz