2022 йилда 2,3 минг нафардан кўп хорижлик Ўзбекистонга кўчиб келди

Доимий яшаш мақсадида келганларнинг асосий қисми Россия ва Қозоғистондан келганларга тўғри келмоқда.

Давлат статистика агентлиги маълумотларига кўра, 2022 йилнинг январь-декабрь ойларида 2322 нафар хорижлик Ўзбекистонга доимий яшаш учун кўчиб келган. Бу 2021 йилнинг мос даврига нисбатан 23,8 фоизга кўпайган.

Ўз навбатида Ўзбекистондан хорижга кўчиб кетган сони эса 8790 нафарни ташкил қилиб, 2021 йилга нисбатан 56,4 фоизга камайган.

Ўзбекистонга хорижий мамлакатлардан кўчиб келганларнинг асосий қисми Россия (813 киши), Қозоғистон (761 киши), Тожикистон (156), Қирғиз Республикаси (111), Туркманистон (38) ва бошқа мамлакатлар (443) ҳиссасига тўғри келган.