Собиқ депутат, табиат ресурслари вазири маслаҳатчиси Расул Кушербаев Озодлик радиосининг Ўзбекистон нефть ва газ конлари бўйича суриштирув юзасидан ўз фикрини билдирди.

Лекин Ўзбекистон расмийлари, соҳага масъул ташкилотлар нима деркан, деб кутдим. Агар расмийлар бу масалада жимлик сақласа демак бу маълумотлар рост, деган фикрга борардим.

Аммо куни кеча Энергетика вазирлиги , “Ўзбекнефтгаз” компанияси томонидан берилган муносабатлар, журналист ва блогерларнинг фикри қолаверса, масъул ташкилотлар томонидан кўрсатилган далиллардан шуни билдимки, назаримда “Озодлик” иккита жиддий хатоликка йўл қўйган.

Биринчиси, Ўзбекистоннинг бутун газ ва нефть конларини барча ҳуқуқлар билан 35 йилга битта компанияга бериши ва 35 млрд АҚШ доллари бир шахсга тегишли корхонага (ERIELL, ENTER Engineering) ишлатилган деган иддао нотўғри бўлиб чиқди», — ёзади у

Кушербаевнинг ёзишича, ушбу айбловларни илгари сурган “Озодлик” ижодкорларида агар Ўзбекистон расмийлари кўрсатган далиллардан кучли далиллар бўлса буни кўрсатиши керак.

Агар бундай далил бўлмаса, хатога йўл қўйилгани тан олиниши керак. Бу ҳам оммавий ахборот воситаларининг муносиб позицияси бўлади.

Таъкидланишича, иккинчидан Ўзбекистон расмийлари билдирган норматив ҳужжатлар қандайдир корхоналарнинг бухгалтерлик ҳужжатларидан кўра ишонарли чиқди. Ва энг муҳими барча келишувлар рўй рост айтилди. Суриштирувдан аввал мана шу эҳтимолий аргументлар инобатга олиниши керак эди.

“Озодлик”нинг суриштируви чуқур асосланмаган иддаолар билан оммага ахборот тарқатишга бўлган уринишга ўхшаб туюлмоқда.

Бу ишдан мақсад нима эканлиги тушунарсизлигича қолди.

Нима бўлганда ҳам бир шахс ёки бир гуруҳ эмас, бутун мамлакат ҳаёти билан боғлиқ маълумот тарқатишдан олдин унинг оқибати қандай бўлишини инобатга олган ҳолда, ҳар томонлама асосли фактларга таянилиши керак.

Айни ўринда ушбу материал том маънода Ўзбекистон халқини жунбишга келтириши мумкин. Асосланмаган ва ишончсиз маълумотларни халқаро омма ихтиёрига ҳавола этиш эса одамларни манипуляция қилиш, дея баҳоланади", — ёзади вазир маслаҳатчиси.