Тошкентдаги кўп қаватли уйларнинг бирининг томига ноқонуний уй қурилди

Қурилиш вазирлиги ҳолат юзасидан текширув ўтказиб, томдаги уйни бузиш учун 15 кун вақт берди.

Қурилиш ва уй-жой коммунал хўжалиги вазирлиги Матбуот хизматининг хабарига кўра, Янгиҳаёт туманининг «Янги турмуш» МФЙда жойлашган «Megapolis building» МЧЖ томонидан 2021 йил қуриб битказилган 10-сон кўп қаватли уйнинг мансарда қисмида мулкдорлар томонидан ноқонуний равишда қўшимча уй қурилган.

Мазкур уйга хизмат кўрсатувчи бошқарув ташкилотларининг бир неча бор огоҳлантиришлари ҳам мулкдорларни ушбу фикрдан қайтармаган.

Айни дақиқаларда мулкдорларга нисбатан маъмурий чора кўрилиб, ноқонуний қурилмаларни 15 кун ичида бартараф этиш бўйича кўрсатмалар берилмоқда.