«Tata Steel Chess-2023». Ягона мағлубият Абдусатторовни 2-ўринга тушириб қўйди
Ушбу мусобақада илк марта қатнашган Нодирбек Абдусатторов «Мастерс» гуруҳида ажойиб иштирок этди. У дастлабки турларданоқ пешқадамлар сафида борди ҳамда 5-турда Магнус Карлсенни мағлуб этгач, пешқадамга айланди. Нодирбек сўнгги турга қадар пешқадамликни қўлдан бермади.
Бугун ҳамюртимиз мезбон спортчи Йорден ван Фореестга қарши оқ доналарда ўйнади. Абдусатторов ғалаба учун ўйнади, аммо ўйин ўрталарида йўл қўйилган 2та хато туфайли устунликни қўлдан чиқариб юборди ва ютқазди. Ўзбекистонлик спортчи турнирни 8 очко билан якунлади.
Нидерландиклик бошқа шахматчи Аниш Гири эса бельгиялик Ричард Раппортни мағлуб этиб, очколар бўйича Абдусатторовдан ўтиб кетди — 8,5 очко. Натижада Гири ўз юртида ўтказилган турнирда чемпионликни қўлга киритди.
Магнус Карлсен сўнгги турда ҳиндистонлик Эригаиси Аржунга қарши ўйнади ва ғалаба қозонди. Норвегиялик шахматчи ушбу ғалаба туфайли ўз очколарини 8,0 тага етказди. Қўшимча коэффициентлар бўйича Абдусатторов Карлсендан юқори туради ва турнирни кумуш билан якунлади.
| № | Шахматчи | Балл | Рейтинги | Коэф. |
| 1 | Аниш Гири | 8.5 / 13 | 2764 | 54 |
| 2 | Нодирбек Абдусаторов | 8 / 13 | 2713 | 51.25 |
| 3 | Магнус Карлсен | 8 / 13 | 2859 | 48 |
| 4 | Со Уэсли | 7,5 / 13 | 2760 | 47 |
| 5 | Фабиано Каруано | 7 / 13 | 2766 | 43.75 |
| 6 | Пархам Мақсудлу | 7 / 13 | 2719 | 42.5 |
| 7 | Левон Аронян | 6.5 / 13 | 2735 | 40.75 |
| 8 | Ричард Раппорт | 6.5 / 13 | 2740 | 37.75 |
| 9 | Праггнанандҳаа | 6 / 13 | 2684 | 38.25 |
| 10 | Йорден ван Фореест | 6 / 13 | 2681 | 38 |
| 11 | Лижен Динг | 5.5 / 13 | 2811 | 34.5 |
| 12 | Гукеш Доммаражу | 5.5 / 13 | 2725 | 34.5 |
| 13 | Винсент Кеймер | 5 / 13 | 2696 | 32 |
| 14 | Эригаиси Аржун | 4 / 13 | 2722 | 25.75 |
Манба: stadion.uz