«WR Chess Masters». Нодирбек Абдусатторов 2-турда ғалаба қозониб, 1-ўринга кўтарилиб олди

Германиянинг Дюсселдорф шаҳрида шахмат бўйича нуфузли «WR Chess Masters» турнирида бугун 2-тур баҳслари бўлиб ўтди. Ҳамюртимиз Нодирбек Абдусатторов бугун оқ доналарда россиялик Андрей Есипенкога қарши ўйнади.

Рақиб 14-юришда хатога йўл қўйди. Нодирбек эса бундан унумли фойдаланиб, баҳсни ғалабага қадар олиб борди. Ўйин сўнгида ватандошимиз рақибнинг фарзинини ҳам уриб олди. Натижада Есипенко 41-юришда таслим бўлди.

Абдусатторов ушбу ғалабадан сўнг ўз очколарини 1,5 тага етказди. Шунингдек, яна 3 шахматчи ҳисобида шунча очко мавжуд. Нодирбек қўшимча кўрсаткичлар бўйича 1-ўринга кўтарилиб олди.

Абдусатторов эртага 3-тур доирасида АҚШлик Левон Аронянга қарши қора доналарда ўйнайди.

Манба: stadion.uz