Дзюдо бўйича ЖЧ. Иккинчи кун, иккинчи медаль!

Дзюдо бўйича Доҳа шаҳри мезбонлик қилаётган жаҳон чемпионатининг иккинчи кунида ҳам Ўзбекистон терма жамосининг ғазнаси яна бир медаль билан бойиди. — 52 кг вазн тоифасида курашган Диёра Келдиёрова кумуш медални қўлга киритди.

Ҳамюртимиз қизиқарли кечган финал беллашувида япониялик Ута Абега имконоятни бой берди. Бу Келдиёрованинг катталар ўртасидаги жаҳон чемпионатларида қўлга киритган илк медали ҳисобланади. Шу билан бирга у жаҳон ва Париж — 2024 Олимпиадаси учун ҳам қимматли рейтинг очкосини ўз ҳисобига ёзиб қўймоқда.

Диёра бугунги баҳсларни иккинчи даврадан бошлаб, дастлаб испаниялик рақибини мағлубиятга учратди. Учинчи босқичда у билан тўқнаш келиши кутилган нариги жуфтликдаги ҳар икки спортчи ҳам дисквалификация қилингач, Келдиёрова чорак финалга тўғридан-тўғри йўл олди. Ярим финал остонасида исроиллик Гефен Примо, финал йўлида эса венгриялик Река Пупп ҳам мағлуб этилганди.

Эслатиб ўтамиз, кеча Дилшодбек Баратов ( — 60 кг) ҳам терма жамоамиз ҳисобига кумуш медални тақдим қилган эди.

Манба: olympic.uz