Тошкентда ИИО ходимлари билан жанжаллашган эркак 10 суткага қамалди — видео

ИИББ тарқалган видео юзасидан маълумот берди.

Аввалроқ, ижтимоий тармоқларда эркак киши ва ИИО ходимлари иштирокида жанжал юзага келгани акс этган видео тарқалди. Ҳолат юзасидан Тошкент шаҳар ИИББ муносабат билдирди.

Маълум бўлишича, жорий йилнинг 14 май куни тахминан соат 18:00 ларда Тошкент шаҳар ИИББ ЙҲХБ ходимлари томонидан Шайхонтоҳур туманидаги жарима майдончаларидан бирига 1986 йилда туғилган И.Д. томонидан ҳеч қандай ҳужжатларсиз бошқариб юрилган TОYOTA русумли транспорт воситаси маъмурий баённома асосида олиб келинган. Бироқ ҳужжатларни расмийлаштириш жараёнида И.Д. жамоат тартибини бузиб, ички ишлар органлари ходимларининг қонуний талабларини бажармай, уларга нисбатан қаршилик кўрсатган.

Мазкур ҳолат юзасидан Шайхонтоҳур тумани ИИО ФМБ томонидан фуқаро И.Д.га нисбатан МЖтКнинг 183-моддаси (майда безорилик), 194-моддаси (ички ишлар органлари ходимининг қонуний талабларини бажармаслик) ва 195-моддаси (ички ишлар органлари ходимларининг ўз хизмат бурчларини бажаришларига қаршилик кўрсатиш) билан маъмурий баённома расмийлаштирилган ҳамда жиноят ишлари бўйича Шайхонтоҳур туман суди томонидан унга нисбатан 10 сутка маъмурий қамоқ жазоси тайинланган.