Саудия Арабистони Ўзбекистон фуқаролари учун электрон виза олиш имконини очди

Мазкур виза орқали саёҳат қилиш, дам олиш, оила ва қариндошларникига ташриф буюриш мумкин.

Саудия Арабистони Ўзбекистон фуқаролари учун электрон виза олиш имконини очди. Бу ҳақда қироллик Туризм вазирлиги хабар берди.

Жорий йилнинг 6 август кунидан бошлаб 8 та давлат фуқаролари учун қиролликка кириш визасини электрон виза портали орқали олиш имконияти яратилди. Мазкур давлатлар ичида Ўзбекистон ҳам бор.

Электрон виза бир йиллик, кўп марталик кириш визаси бўлиб, сайёҳларга мамлакатда 90 кунгача бўлиш имконини беради. Ушбу виза билан Ҳаж зиёрати қилиш мумкин эмас. Шунингдек, электрон виза қиролликда ишлаш ҳамда яшаш ҳуқуқини бермайди. Электрон виза муддати тугагач, уни янги муддатга расмийлаштириш мумкин.

Электрон виза билан саёҳат қилиш, дам олиш, оила ва қариндошларникига ташриф буюриш мумкин.

Электрон виза учун ариза visa.visitsaudi.com сайти орқали берилади.