Андижонда Суриядаги жангарилар сафига қўшилмоқчи бўлган шахслар қўлга олинди

Улар хорижда мигрантларни иш билан таъминловчи хусусий бандлик фирмаси орқали Туркия давлатига бориб, сўнгра Сурияга ўтмоқчи бўлишган.

Суриядаги жангарилар сафига бориб қўшилмоқчи бўлган Андижон вилоятининг Олтинкўл туманида яшовчи 3 нафар фуқаро қўлга олинди. Бу ҳақда ДХХ матбуот хизмати хабар берди.

Аниқланишича, улар ҳозирда жангарилар сафида бўлган “Абу Салоҳ”, “Абу Валид” ва “Аюб” лақабли шахсларнинг интернет тармоғида ёшларни террористик гуруҳларга қўшилишга чорловчи даъватлари таъсирига тушишган ҳамда оила аъзоларининг қаршилигига қарамасдан Сурияга кетишни мақсад қилишган.

Жумладан, фуқаро А.Ў. Telegram'да “Абу Валид” билан алоқада бўлиб, унинг кўрсатмаси билан турли виртуал канал ва гуруҳлар очган ҳамда тарғибот ишларини олиб борган. Кейинроқ, у маҳалладоши И.Д. билан тил бириктириб, Сурия давлатидаги “Тавҳид ва жиҳод катибаси” террористик ташкилоти сафига қўшилишни режа қилишган.

Ўз навбатида, И.Д. яқин ўртоғи Ғ.Л.ни ҳам ўзлари билан кетишга кўндирган.

Таъкидланишича, мазкур шахслар бошқаларнинг эътиборини тортмаслик мақсадида, хорижда мигрантларни иш билан таъминловчи хусусий бандлик фирмаси орқали Туркия давлатига бориб, сўнгра Сурияга ўтмоқчи бўлишган.

Ҳозирда мазкур 3 нафар фуқарога нисбатан жиноят иши қўзғатилган.