“SILK AVIA”даги “Uzbekistan Airports” нинг 100 фоиз улуши “Uzbekistan Helicopters” га ўтказилади

Авиакомпания устав капиталидаги “Uzbekistan Airports” улуши “Uzbekistan Airways” таркибидаги “Uzbekistan Helicopters” устав капиталига ўтказилмоқда.

“Ҳуқуқий ахборот” Telegram каналининг хабарига кўра, Президентнинг “Авиация фаолиятини самарали ташкил этишга оид қўшимча чора-тадбирлар тўғрисида”ги тегишли қарори қабул қилинган.

Таъкидланишича, қарорга кўра, қуйидагилар амалга оширилади:

“SILK AVIA” МЧЖ устав капиталидаги “Uzbekistan Airports” АЖнинг 100 фоиз улушини унинг брендини сақлаб қолган ҳолда “Uzbekistan Airways” АЖ таркибидаги “Uzbekistan Helicopters” МЧЖ устав капиталига ўтказилади;

“Uzbekistan Аirports” АЖнинг 3 та “АТR72-600” русумли ҳаво кемаси “SILK AVIA” МЧЖга беғараз ўтказилади;

“SILK AVIA” МЧЖ фаолиятини самарали ташкил этиш ва ривожлантириш стратегиясини амалга ошириш доирасида “АТR72-600” русумли ҳаво кемалари сони оширилади;

“Uzbekistan Airways” АЖ таркибидаги “Uzbekistan Helicopters” МЧЖ зиммасига маҳаллий авиақатновларнинг сонини ошириш, парвозлар географиясини кенгайтириш, янги йўналишларни йўлга қўйиш ҳамда “АТR72-600” русумли ҳаво кемалари паркини ривожлантириш вазифалари юкланади.