Андижонда учта туман кўмир омбори мудирлари аҳолига ажратилган кўмирларни “еб юборишди”
Омбордаги уч тоннадан кўп кўмирларни талон-торож қилган омбор мудирларига жиноят иши қўзғатилди.
Андижон вилоятининг 3 та туманидаги “Кўмир таъминот” МЧЖ тасарруфидаги омбор мудирлари халқ кўмирини талон-торож қилди. Бу ҳақда вилоят прокуратураси Матбуот хизмати хабар берди.
“Кўмир таъминот” МЧЖнинг Андижон вилоят филиали тасарруфидаги Андижон туман кўмир омбор мудири Ш.Б. куз-қиш мавсумида аҳолига имтиёзли нархда тарқатишга мўлжалланган 362,3 млн сўмлик 1,22 минг тонна кўмирни талон-торож қилган.
Шунингдек, Булоқбоши туман кўмир омбори мудири С.Н. 178,3 млн сўмлик 445,5 тонна ҳамда Жалақудуқ туман кўмир омбор мудири Й.Ю. 421,7 млн сўмлик 1 419,9 тонна кўмирларни гўёки фуқаролар олганлиги тўғрисида сохта маълумотлар тайёрлаб, кўмирни нақд пулга сотишиб, шахсий манфаатлари йўлида талон-торож қилишган.
Мазкур ҳолатлар юзасидан омбор мудирлари Ш.Б., С.Н., ва Й.Ю.га нисбатан ЖКнинг 167-моддаси 3-қисми “а ” банди ва бошқа моддалари билан жиноят ишлари қўзғатилиб, ушбу шахслар Жиноят-процессуал кодекснинг 221-моддаси тартибида ушланди.
Жиноят ишлари юзасидан дастлабки тергов ҳаракатлари вилоят прокуратураси томонидан олиб борилмоқда.
