Олтинчи синф ўқувчиси PUBG ўйнаш учун отасининг 3.8 миллион сўмини сарфлаб юборган

Олтинчи синф ўқувчисиPUBG (PlayerUnknown’s Battlegrounds) онлайн ўйин учун отасининг 3.8 миллион сўм пулини сарфлаб юборган. Бу ҳақда ИИВ маълумотларига ҳавола қилиб, мухбиримиз хабар бермоқда.

Гулистон шаҳридан бўлган 38 ёшли фуқаро ҳуқуқни муҳофаза қилиш органларига ариза билан мурожаат қилган. Унинг сўзларига кўра, картасидан 3,8 миллион сўм йўқолган. Тезкор – қидирув тадбирлари натижасида ҳуқуқ-тартибот идоралари ходимлари пулни ўғирлаган шахс олтинчи синф ўқувчиси-жабрланувчининг 14 ёшли ўғли эканлигини аниқлашган.

Тергов давомида ўспирин PUBG онлайн ўйинидаги аккаунтига отасининг пластик картасини улаб, турли хил нарсаларни сотиб олишга пул сарфлагани аниқланган.

Ҳозирги вақтда ушбу ҳолат бўйича текширув ўтказилмоқда.

«Ҳурматли фуқаролар, фарзандларингизни тарбиялашга бефарқ бўлманг, уларнинг мобил телефонлари ва гаджетларини текширинг», — дейилмоқда расмий баёнотда.