Отангни ўлдирдим ва сени ҳам ўлдираман. Тошкентда бир киши беш соат давомида собиқ хотинини вахшиёналарча калтаклаган

Бугун ижтимоий тармоқларда даҳшатли видео пайдо бўлди, унда мажруҳланган аёл эрининг калтаклаши ва қийноққа солиши ва масъул идораларнинг ҳаракатсизлиги ҳақида гапирган. Аёл, шунингдек, собиқ турмуш ўртоғи психотроп дорилар таъсири остида унинг отасини ҳам ўлдирганини айтмоқда. Бу ҳақда зўравонликка қарши “Немолчи.уз” лойиҳаси маълумотларига таянган ҳолда мухбиримиз хабар бермоқда.

Жабрланувчи аёл 2017 йилда Шохруз Бўтаевга турмушга чиққан, уларнинг никоҳидан бола туғилган. 2019 йилда у эри билан ажрашган ва боласи билан тўри келган жойда яшаган, аммо адвокатларнинг маслаҳати билан эрининг уйига кўчиб кирган.

Ҳодиса 8 октябрда содир бўлган. Аёл ёлғиз қолганида, собиқ эри ҳовлида телевизор ва радио овозини баланд қилиб, уни мажбуран уйга олиб кирган ва эрталаб соат 11дан кеч соат 4 гача калтаклаган, шунингдек пичоқ билан яралаган. Шу билан бирга, у «Устимдан ички ишларга шикоят қилиб, уйимда қаҳрамон каби яшамоқчисанми? Бундай бўлмайди, ўлимнинг ўзи сени бу уйга олиб келди, мен отангни атайлаб ўлдирдим ва сени ҳам ўлдираман. Бу ердан жасадинг чиқади», — дея таъкидлаган.

Аёл бир неча бор ҳушидан кетиб, вахшийдан уни қўйиб юборишини илтимос қилган. Эрининг ўлимдан олдин охирги сўзларни айтиш талабига жавобан, аёл сув сўраган ва ўғлини кўрсатишни илтимос қилган. Шу пайт унинг манзилини билган дугонаси қўнғироқ қилиб қолган. Бирдан эри қўрқиб кетган, қийноқларни тўхтатиб, ўзи собиқ хотинини Тошкентдаги Республика шошилинч тиббий ёрдам илмий марказига (собиқ 16 шаҳар касалхонаси) олиб борган. Шу билан бирга, агар аёл ички ишларга шикоят қилса, уни ўлдириш билан таҳдид қилган.

Қизиғи шундаки, тез тиббий ёрдам шифокорлари милицияни чақиришмаган, шунга кўра, аёлнинг ўзи тиббий кўрикдан ўтган ва калтаклаш изларини расмга олган. Видеода жабрланувчи ваколатли идоралардан ёрдам сўраган, собиқ эрининг ички ишларда танишлари борлигига иддао қилган ва шунинг учун ҳеч бу ишга ҳеч ким қўл урмаётганини айтган.

Видео ижтимоий тармоқларда пайдо бўлганидан сўнг, Ички ишлар вазири Пўлат Бобожоновнинг шахсий топшириғи билан 16-касалхонага масъул ходимлар ташриф буюришган, иш назоратга олинган, эркак ушланган ва жиноий иш қўзғатилган. Бироқ, Ички ишлар вазирлигининг расмий каналида бу иш ҳақида ҳали ҳеч нарса айтилмаган.

Ушбу ҳодиса кўплаб саволларни туғдиради, хусусан, нима учун аёлнинг отасини ўлдирилгани бўйича тергов ўтказилмаган, гарчи бу ҳақда маълум бўлсада? Нима учун ҳуқуқни муҳофаза қилиш идоралари доимий равишда психотроп дорилар таъсирида бўлган одамга ҳеч қандай чора кўришмайди? Ва ниҳоят, нима учун шифокорлар юзида соғ жойи қолмаган ва зўравонликка учраган беморга ички ишлар ходимларини чақиришни лозим деб топишмаган?