Давлат фуқаролик хизматчиларининг компетенцияларини ривожлантириш ва баҳолаш бўйича Корея тажрибаси ўрганилмоқда
Президент ҳузуридаги Давлат хизматини ривожлантириш агентлиги Кореянинг Инсон ресурсларини ривожлантириш миллий институти ва Персонални бошқариш вазирлиги билан ҳамкорлик қилиб келмоқда. Бу ҳақда Ўзбекистон Республикаси Президенти ҳузуридаги Давлат хизматини ривожлантириш агентлиги хабар берди.
Маълумот учун: 2023 йил октябрь ойида Давлат хизматини ривожлантириш агентлиги ва Корея Республикаси Персонални бошқариш вазирлиги ҳамда Институт ўртасида англашув меморандумлари имзоланган.
Икки томонлама ҳамкорликни янада ривожлантириш мақсадида Агентлик ходимлари ва Давлат бошқаруви академияси профессор ўқитувчилари учун қисқа муддатли стажировка курси ташкил этилди. Мақсад – давлат фуқаролик хизматчиларининг компетенцияларини ривожлантириш ва баҳолаш бўйича хорижий тажрибани ўрганиш.
Бугун делегация Корея Республикаси раҳбар кадрларини баҳолаш бўйича Ассессмент марказида бўлишди. Марказ фаолияти, шунингдек, кадрларни компетенциялар асосида баҳолаш механизми билан яқиндан танишишди.
Соҳага оид қатор учрашув ва тадбирларни ўз ичига олган стажировка дастури жорий йилнинг 23 декабрига қадар Сеул шаҳрида давом этади.