Сурхондарёда йирик газ қувурида авария юз берди: вилоят аҳолисининг аксарияти газсиз қолди

Сурхондарёдаги магистраль газ қувуридаги авария туфайли 8 туман ва вилоят маркази табиий газдан узилди.

Бугун, 28 декабрь куни Сурхондарёнинг Бандихон тумани «Полвонтош» маҳалласи ҳудудидан ўтувчи «Музработ-Душанбе» магистраль газ қувурининг 101-190 км оралиғидаги Д — 700 мм бўлган магистраль газ қувурида авария ҳолати юзага келди. Бу ҳақда вилоят ҳокимлиги Матбуот хизмати хабар берди.

Шу муносабат билан бугун соат 6:30 дан вилоятнинг қуйидаги шаҳар ва туманларидаги истеъмолчиларга табиий газ етказиб бериш вақтинча тўхтатилди:

— Термиз шаҳри;
— Бандихон тумани;
— Қизириқ тумани;
— Музработ тумани;
—Термиз тумани;
— Жарқўрғон тумани;
— Қумқўрғон тумани;
— Ангор тумани;
— Шеробод тумани.

Таъмирлаш ишлари тугатилгандан сўнг табиий газ таъминоти қайта тикланади.