Tata Steel Chess 2024. Нодирбек Абдусатторов 9-турда жуда тез ғалабага эришди

Нидерландиянинг Вейк ан-Зее шаҳрида шахмат бўйича Tata Steel Chess 2024 турнирида бугун 9-тур баҳслари ўтказилмоқда.

Турнирнинг Мастерс гуруҳида иштирок этаётган ўзбекистонлик гроссмейстер Нодирбек Абдусатторов 9-турда нидерлендиялик Йорден Ван Форрестга қарши оқ доналарда ўйнади.

Мезбон спортчиси 24-юришга келиб таслим бўлди. Боиси, компьютер баҳоси бўйича ўзбекистонлик шахматчи жуда катта устунликка эга бўлганди.

Ушбу ғалаба туфайли Абдусатторовнинг очколари 5,5 тага етди ва яна пешқадамга айланди. 8-турдан кейин пешқадам бўлиб турган Аниш Гири бугун хитойлик Динг Лиренг билан дурангга имзо чекди ва очколарини 5,5га етказди. Қўшимча кўрсаткич бўйича Нодирбек олдинда турибди.

Tata Steel Chess — 2023 мусобақасининг 10-турида Нодирбек эртага нидерлендиялик Макс Вармердамга қарши қора доналарда ўйнайди.

Манба: stadion.uz