Tata Steel Chess 2024. Нодирбек Абдусатторов 8 соат давом этган ўйинда нидерландиялик учинчи шахматчини мағлуб этди

Нидерландиянинг Вейк ан-Зее шаҳрида шахмат бўйича Tata Steel Chess 2024 турнирида кеча 10-тур баҳслари ўтказилди.

Турнирнинг Мастерс гуруҳида иштирок этаётган ўзбекистонлик гроссмейстер Нодирбек Абдусатторов бу турда нидерлендиялик Макс Варвердамга қарши қора доналарда ўйнади.

Дебютдаги 20 та юришдан кейин вазият тенг эди. Кейин эса мезбон спортчи 2-3 хатога йўл қўйган бўлса, Абдусатторов кучли юришларни топа бошлади ва 30-юришга келиб ютуқли вазиятга эга бўлди. Боз устига, рақиб цейтнот ҳолатига тушиб қолди. Шунга қарамай, Варвердам аниқ юришларни топа бошлади ва вазиятни тенглаштирди.

Айнан вақт қўшиладиган пайтга келиб (39-юриш) Нодирбек бир пиёдани қурбон бериб, бошқасини асраб қолиш керак бўлган пайтда бу юришни топа олмади ва хатони юришни амалга оширди. Шундан сўнг устунликлик Макс томонига ўтиб кетди.

Аммо рақибнинг устунлиги узоққа чўзилмади. Нидерланд шахматчиси 42-юришдан «текин» пиёдани уриб, ноаниқликка йўл қўйган бўлса, Фарзин билан кейинги юришда қўпол хато қилди. Натижада вазият тенглашди.

Абдусатторов эса бундан унумли фойдаланиб, аста-секин рақибни қийин вазиятга тушира бошлади ҳамда 71-юришга келиб ғалабани расмийлаштирди.

Ушбу ғалаба туфайли Абдусатторовнинг очколари 6,5 тага етди ва у пешқадамликни мустаҳкамлади. Ҳиндистонлик Домараджу Гукеш ҳисобида ҳам шунча очко бор.

Tata Steel Chess — 2023 мусобақасида бугун дам олиш куни. Ҳамюртимиз эртага хитойлик аёл Жу Венжунга қарши оқ доналарда ўйнайди.

Манба: stadion.uz