Ўзбекистон ва ЕИ ўртасида Кенгайтирилган шериклик ва ҳамкорлик битими имзоланди

Брюсселдаги Европа кенгаши бош қароргоҳида Ўзбекистон-Европа саммитида Ўзбекистон билан Европа Иттифоқи ўртасида кенгайтирилган шериклик ва ҳамкорлик тўғрисидаги битим имзоланди. Бу ҳақда президент матбуот хизмати хабар қилди.

Кенгайтирилган шериклик ва ҳамкорлик тўғрисидаги битим (КШҲТБ) амалдаги — 1999 йил 1 июлда кучга кирган Шериклик ва ҳамкорлик тўғрисидаги битим ўрнини босиши керак. Янги ҳужжат бўйича музокаралар 2018 йил июль ойида бошланган. Дастлаб Тошкент уни 2020 йилда имзолашни режалаштирганди, бироқ пандемия бу жадвални ўзгартирган. 2022 йил июль ойида томонлар ҳужжат матнини тасдиқлаганди.

Аввалги ҳадли форматдан фарқли ўлароқ, КШҲТБ Ўзбекистон ва Европа Иттифоқи ўртасидаги ўзаро ҳамкорликнинг тўлақонли механизмини шакллантиради. Ҳужжатга янги йўналишлар — ташқи сиёсат, хавфсизлик, конфликтларнинг олдини олиш ва инқирозларни бошқариш, шахсий маълумотларни ҳимоя қилиш, бошпана бериш ва чегараларни назорат қилиш масалалари, ноқонуний миграция, коррупция, уюшган жиноятчилик ва терроризмга қарши курашиш киритилган.

Ҳужжат Ўзбекистон ишлаб чиқарувчилари учун савдо-иқтисодий алоқаларни либераллаштириш орқали Европа бозорларига чиқиш учун кенг имкониятлар очади, дея таъкидлади Ўзбекистон Инвестициялар, саноат ва савдо вазирлиги.

Битим доирасида савдо тартиб-таомиллари соддалаштирилади ва техник тўсиқлар камайтирилади. Бу Ўзбекистон саноати учун янги экспорт йўналишларини яратиши ва Европа бозорида маҳсулотларнинг рақобатбардошлигини ошириши кутилмоқда.

Битим, шунингдек, капитал ва инновацияларнинг эркин ҳаракати, тўғридан-тўғри инвестицияларни ҳимоя қилиш ва ҳуқуқий кафолатларни мустаҳкамлашни белгилайди. Шаффоф ҳуқуқий муҳит Европа инвесторлари учун Ўзбекистоннинг жозибадорлигини ошириши кутилмоқда.

Бундан ташқари, ҳужжат ЖСТнинг асосий тамойилларига таянган ҳолда инвестиция, савдо ва интеллектуал соҳалардаги ҳамкорлик доирасини сезиларли даражада кенгайтиради. Ўз навбатида, Ўзбекистон томонидан кутилаётган GSP+ тизимини қўллашнинг кенгайиши ва ЖСТга аъзо бўлиш жараёнининг илгари сурилиши мамлакатнинг халқаро савдодаги мавқеини мустаҳкамлайди.

Марказий Осиёда Европа Иттифоқи билан икки давлат — Қозоғистон ва Қирғизистон аллақачон КШҲТБ тўғрисида битим тузган. Қозоғистон келишувни 2015 йилда имзолаган, у 2020 йил 1 мартдан тўлиқ кучга кирган. Ҳужжат 29 та йўналишни қамраб олади ва 1995 йилги эски битимда мавжуд бўлмаган ҳамкорликнинг янги соҳаларини жорий этади: космик хавфсизлик, терроризмга қарши кураш ва давлат хизматини ривожлантириш.