Шавкат Мирзиёев — Марказий Осиёда самарали минтақавий институтларнинг аҳамияти ҳақида
«Минтақавий ҳамкорликни чуқурлаштиришни давом эттириш — мавжуд механизмларни мустаҳкамлаб, уларга барқарор тус ва амалий маъно-мазмун бағишлаш зарур», — дейилади президент мақоласида.
Маслаҳат учрашувлари формати 2017 йилда бошланган. «Кўп йиллар давомида биринчи марта минтақа етакчилари ташқи воситачиликсиз тизимли ва мунтазам мулоқотни бошладилар, бу янги сиёсий тафаккур — ишончли, очиқ ва умумий манфаатларни англашга асосланган фикрлашнинг рамзига айланди. Айнан маслаҳат учрашувлари доирасидаги мулоқот туфайли бир қатор эски қарама-қаршиликларни бартараф этишга ва ишончсизликдан ҳақиқий ҳамкорликка ўтишга муваффақ бўлинди,» — деди давлат раҳбари.
Шавкат Мирзиёев ҳамкорликни институтсионал жиҳатдан расмийлаштириш муҳимлигини қайд этди. 2023 йилда Душанбеда бўлиб ўтган бешинчи маслаҳат учрашувида давлат раҳбарларининг келишувларини тайёрлаш ва амалга оширишнинг доимий механизми сифатида Миллий мувофиқлаштирувчилар кенгашини таъсис этиш тўғрисида қарор қабул қилинди. «Ушбу механизмнинг ишга туширилиши Маслаҳат учрашувлари форматига тизимли тус бериш ва биргаликда илгари сурилган ташаббусларни амалга оширишда изчилликни таъминлаш имконини берди».
Парламентлараро мулоқот ва Хавфсизлик кенгашлари котиблари даражасида мунтазам учрашувлар йўлга қўйилган.
2022 йилда Чўлпонота учрашуви якунлари бўйича суверен тенглик, ўзаро қўллаб-қувватлаш ва минтақа келажаги учун биргаликда масъулият тамойилларини мустаҳкамлаган XXI асрда Марказий Осиёни ривожлантириш йўлидаги дўстлик, яхши қўшничилик ва ҳамкорлик тўғрисидаги шартноманинг имзоланиши шартномавий-ҳуқуқий базани мустаҳкамлашга хизмат қилди. 2025 йилда Тожикистон ушбу ҳужжатга қўшилди.
«Биз ушбу қарорни олқишлаймиз ҳамда яқин истиқболда Марказий Осиёда ўзаро ишонч, яхши қўшничилик ва стратегик шериклик руҳини узил-кесил мустаҳкамлашга хизмат қиладиган мазкур шартнома минтақанинг барча давлатлари томонидан имзоланишини кутиб қоламиз», — деб ёзади президент.
2022 йилда давлат раҳбарлари томонидан Марказий Осиё давлатларининг кўп томонлама форматлар доирасидаги ҳамкорлиги концепцияси тасдиқланди, унда минтақа мамлакатлари ўртасида халқаро платформаларда, шу жумладан «Марказий Осиё плюс» форматларида мувофиқлаштириш доираси белгилаб берилди.
У 2024 йилда Остонада бўлиб ўтган саммитда қабул қилинган «Марказий Осиё — 2040» минтақавий кооперацияни ривожлантириш концепциясини муҳим дастурий ҳужжат деб атайди. — У минтақавий хавфсизликни таъминлаш ва мамлакатларимиз тараққиётига қаратилган ҳамкорликнинг узоқ муддатли устувор йўналишларини белгилаб берди.
«Шу тариқа кўп қиррали ўзаро ҳамкорлик архитектурасини барпо этар эканмиз, ривожланиш учун улкан манбаларни кашф этдик», — деди Шавкат Мирзиёев.
«Бугунги кунда Марказий Осиё ўз жадал тараққиётининг янги босқичига қадам қўймоқда. Биз икки томонлама масалаларни ҳал этишдан иқлим ўзгариши, энергетика соҳасидаги ўтиш, сув ва озиқ-овқат хавфсизлигини таъминлаш, рақамли технологияларни ривожлантириш каби асосий минтақавий таҳдидларга биргаликда ечим топиш сари бормоқдамиз. Мамлакатларимиз олдида умумий масъулият, ўзаро ишонч ва келажагимиз ҳақидаги якдил тасаввурга асосланган ҳамкорликнинг янги уфқлари очилмоқда» — дейилади мақолада.