Шавкат Мирзиёев «Росатом» раҳбари Алексей Лихачёвни қабул қилди
Ўзбекистонда интеграциялашган атом электр станциясини қуриш лойиҳасини рўёбга чиқаришнинг амалий жиҳатлари, шунингдек, атом энергиясидан тинчлик мақсадларида фойдаланиш борасидаги ҳамкорликни кенгайтириш масалалари муҳокама қилинди.
2025 йилнинг октябрь ойида биринчи кам қувватли реактор биноси учун пойдевор қўйиш ишлари бошлангани қайд этилди. Электр станцияни лойиҳалаштириш ишлари давом этаётгани таъкидланди.
Бундан ташқари, ўтган йили «ММФИ» миллий тадқиқот ядро университетининг Тошкентдаги филиали негизида атом энергетикаси ва ядро технологиялари бўйича илғор муҳандислик мактаби ишга туширилгани айтиб ўтилди.
Шунингдек, қишлоқ хўжалиги ва тиббиётда ядро технологияларини қўллаш, соҳада малакали кадрларни тайёрлаш, фанни ривожлантириш ҳамда ижтимоий лойиҳаларни амалга ошириш борасида ҳамкорликни ривожлантиришга эътибор қаратилди.
Эслатиб ўтамиз, сентябрь ойи охирида Ўзбекистон ва Россия Жиззахдаги бўлғуси атом станцияси конфигурациясини белгилайдиган ҳужжатларни имзолаганди. Томонлар реакторлар учун ядро ёқилғисини етказиб бериш ҳақида ҳам келишиб олган. Энергоблокларни 2029−2035 йиллар оралиғида ишга тушириш режалаштирилган. Кичик ва йирик атом электр станциясини жойлаштириш орқали лойиҳа «мегаватт-соат бўйича энг тежамкор вариант» бўлиши кутилмоқда.
У иккита кичик қувватли РИТМ — 200Н реактори ва иккита йирик ВВЕР — 1000 реакторини ўз ичига олади. Станциянинг умумий қуввати 2110 МВтни ташкил этади, тўлиқ ишга туширилгандан сўнг йиллик электр энергияси ишлаб чиқариш 16−17 миллиард кВт/соатга етиши кутилмоқда, бу эса Ўзбекистон энергетика комплексига 12−15 фоиз ҳисса қўшади. Тахминий хизмат муддати — 60 йил.
Кичик АЭС Россиянинг атом музёрарларида қўлланган РИТМ — 200Н босимли сув реактори негизида қурилади. Бироқ бу реакторларга эга қуруқликдаги АЭС ҳали қурилмаган ва референт эмас (синовдан ўтмаган). Бундан ташқари, Ўзбекистон йирик ва кичик АЭС бир майдонда бирлаштирган дунёдаги биринчи давлатга айланади.