Уюшган жиноятчиликка қарши курашни кучайтириш масаласи президент ҳузурида муҳокама қилинди
Президентга қилинган тақдимотда кейинги йилларда уюшган жиноятчиликнинг шакллари ва усуллари ўзгариб бораётгани қайд этилди. «Уюшган гуруҳлар томонидан жамиятда юриш-туриш қоидаларини очиқчасига менсимасдан, ўзини қонундан устун қўйиб, безорилик жиноятларини содир этгани ёки безорилик жиноятининг оғир шаклларидан бири — ўқотар қуролни намойиш қилиб ёки уни қўллаб ҳамда такроран содир этгани, шунингдек, жамоат тартибини сақлаш вазифасини бажариб турган ҳокимият вакилига қаршилик кўрсатган ҳолда содир этилганлик учун жазо чоралари бугунги кунда етарли таъсир кучига эга эмас», — дейилади хабарда.
Сўнгги вақтларда ёшлар иштирокида жанговар (аралаш) спорт турлари бўйича ноқонуний жангларни яширинча ташкил этиш ҳолатлари ҳам кузатилмоқда. Қонунчиликда бундай ҳаракатлар учун жавобгарлик чоралари кўзда тутилмаган.
Президент бу каби таҳдидларнинг олдини олиш, уларга қарши муросасиз курашиш ва бундай ҳолатларни таг-томири билан йўқ қилишга қаратилган нормаларни қонунчиликка киритиш вақти келганини таъкидлади.
Оғир ва ўта оғир жиноятларни содир этиш мақсадида жиноий уюшма тузиш, уни молиялаштириш, бундай гуруҳлар томонидан содир этилган жиноятларни яширишга кўмаклашиш, шунингдек, жанговар спорт турлари бўйича мусобақаларни ноқонуний ташкил этиш ва ўтказиш учун жиноий жавобгарликни назарда тутувчи нормаларни жорий этиш таклиф қилинди.
Шу билан бирга, безорилик учун жазо чораларини кучайтириш ҳамда ноқонуний ташкил этилган жанговар спорт мусобақаларида иштирок этганлик учун маъмурий жавобгарликни белгилаш таклиф қилинди.
Уюшган жиноятчиликка ва жамоат жойларидаги жиноятчиликка қарши курашишнинг жиноий-ҳуқуқий механизмларини кучайтиришга қаратилган қонун лойиҳаси тайёрлангани хабар қилинмоқда.
Январь ойи охирида ўтказилган йиғилишда Шавкат Мирзиёев Ўзбекистон ичида ва хорижда уюшган жиноий гуруҳлар фаолиятига чек қўйиш бўйича кўрилаётган чоралар етарли эмаслигини танқид қилган эди. У трансчегаравий ва виртуал маконда уюшган жиноятчиликка қарши курашишнинг ягона тизимини шакллантириш бўйича топшириқ берганди. Шунингдек, ИИВ таркибида уюшган жиноятчиликка қарши курашиш бўйича алоҳида бўлинма ташкил этилиши маълум қилинган эди.
Ахборот технологиялари соҳасидаги жиноятчилик
Тақдимотда кибержиноятчилик ва ахборот технологияларидан фойдаланган ҳолда содир этилаётган ҳуқуқбузарликларга қарши курашишни такомиллаштириш бўйича таклифлар ҳам кўриб чиқилди.
Қайд этилишича, охирги олти йил ичида кибержиноятлар бўйича ҳуқуқни муҳофаза қилиш органларига қилинган мурожаатлар сони 48 бараварга ошган. Ўтган йили фирибгарликларнинг 82 фоизи ва ўғриликларнинг 76 фоизи кибермаконда содир этилган. Жисмоний ва юридик шахсларга етказилган моддий зарар миқдори 2 триллион сўмдан ошиб кетган. Учта банк тизимидаги заифликлар туфайли 3025 нафар мижозга 17 миллиард сўмлик моддий зарар етказилган.
Ўтган йилнинг апрель ойида президент кибержиноятларга қарши курашиш чораларини кучайтириш тўғрисидаги қарорни имзолаганди. Унга кўра, банклар ўз тизимларидаги заифликлар туфайли кибержиноятлардан жабр кўрганларга зарарни қоплаб бериши шарт. Шунингдек, ўз банк карталари, ҳисоб рақамлари ва SIM карталаридан кибержиноятлар содир этиш мақсадида фойдаланишга йўл қўйиб берган шахслар учун ҳам жавобгарлик жорий этилган.