Ўзбекистонда шахсга доир маълумотлар тўғрисидаги қонун юмшатилди. Бу орқали Apple Pay ва Google Pay хизматларини ишга тушириш мумкин

Ўзбекистонда «Шахсга доир маълумотлар тўғрисидаги қонунга маълумотларни сақлаш ва қайта ишлаш қоидаларини либераллаштиришга қаратилган ўзгартиришлар киритилди. Бу ҳақда Адлия вазирлигининг ахборот каналида хабар берилди.

Президент томонидан 26 март куни имзоланган қонунга кўра, мамлакат ичида фақат маълумотларнинг айрим тоифалари — хусусан, жисмоний шахсларнинг биометрик ва генетик маълумотлари, шунингдек, Ўзбекистонда фаолият юритувчи телекоммуникация операторлари фойдаланувчиларининг маълумотлари мажбурий сақланиши керак.

Юқорида кўрсатилмаган шахсга доир маълумотлар қуйидаги шартлардан бири бажарилганда, Ўзбекистондан ташқарида сақланиши ва ишлов берилиши мумкин:

• чет давлатни шахсга доир маълумотларнинг бир хил ҳимоя қилинишини таъминловчи давлат сифатида тан олиш;
• оператор томонидан ваколатли давлат органи тасдиқлайдиган талабларга жавоб берувчи стандарт шартномавий шартлар ёки мажбурий корпоратив қоидалар қабул қилиниши ва уларга риоя этилиши;
• рўйхати ваколатли давлат органи томонидан тасдиқланадиган шахсга доир маълумотларни бошқариш ва сақлаш соҳасидаги халқаро стандартларга оператор томонидан риоя этилиши.

  
  Аввалроқ Вазирлар Маҳкамасига шахсга доир маълумотларни ҳимоя қилишнинг зарур даражаси таъминланадиган давлатлар рўйхатини тасдиқлаш ҳуқуқи берилгани хабар қилинганди.

Ушбу тузатишлар Apple Pay, Google Pay ва PayPal халқаро тўлов хизматларининг бозорга киришига йўл очиши кутилмоқда.

Қонун расмий эълон қилинган кундан бошлаб кучга киради.