Embraer Ўзбекистон ҲҲК учун мўлжалланган илк C-390 ҳарбий-транспорт самолётини тақдим этди

Бразилиянинг Embraer авиасозлик компанияси Ўзбекистон Ҳарбий-ҳаво кучлари учун ишлаб чиқарилган илк C — 390 Millennium ҳарбий-транспорт самолётини кўрсатди.

Компания эълон қилган суратларда самолётнинг кулранг тусда эканини, корпусида UZ AIR FORCE ёзуви, Ўзбекистон байроғи ва ҲҲК фарқловчи белгилари, дум қисмида эса UK 39010 борт рақами акс этганини кўриш мумкин.

«Бугун Embraer Ўзбекистон Ҳарбий-ҳаво кучларига қарашли биринчи C — 390 Millennium самолётини тақдим этмоқда. Натижада Ўзбекистон Республикаси Марказий Осиёда C — 390 русумининг илк буюртмачисига айланди», — дейилади компания баёнотида.

Ўзбекистон C — 390 Millennium харид қилиши ҳақида илк бор февраль ойида, Singapore Airshow халқаро авиасалонида маълум қилинганди. Ўшанда Embraer бунга қадар номи ошкор этилмаган буюртмачи айнан Ўзбекистон эканини очиқлаганди.

Мазкур самолётлар, асосан, транспорт ва инсонпарварлик миссияларини бажаришга мўлжалланган. Ўзбекистон буюртма қилган C — 390 сони ва шартнома қиймати ошкор этилмаган.

C — 390 Millennium — 26 тоннагача юк кўтариш қувватига эга ҳарбий-транспорт самолёти ҳисобланади. Унинг максимал крейсерлик тезлиги тахминан 470 узел (соатига қарийб 870 км)ни ташкил этади. Самолёт ҳарбий хизматчилар ва юкларни ташиш, техника ҳамда шахсий таркибни десант қилиш, тиббий эвакуация, қидирув-қутқарув ва гуманитар операцияларни бажариш, шунингдек, ёнғинларни ўчириш имкониятига эга. Бундан ташқари, у вақтинчалик ва грунт учиш-қўниш йўлакларида ҳам ҳаракатланишга мослашган.

Тез ўрнатилувчи ва ечилувчи махсус жиҳозлар билан таъминланган KC — 390 модификациясидан бошқа самолётларга ҳавода ёнилғи қуйишда, шунингдек, парвоз чоғида ёнилғи қабул қилишда ҳам фойдаланиш мумкин.

Ҳозирда Ўзбекистон ҲҲК авиапаркида Ил — 76 ва CASA C — 295 ҳарбий-транспорт самолётларидан фойдаланилмоқда.