Дин ишлари бўйича қўмита раисига биринчи ўринбосар тайинланди

Имом Мотуридий халқаро илмий-тадқиқот маркази директори Давронбек Махсудов Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари этиб тайинланди. У мазкур лавозимда президентга маслаҳатчи бўлиб кетган Музаффар Комиловнинг ўрнини эгаллади.

Вазирлар Маҳкамаси ҳузуридаги Дин ишлари бўйича қўмита раисининг биринчи ўринбосари лавозимига Махсудов Давронбек Рустамович тайинланди. Бу ҳақда қўмита Ахборот хизмати хабар берди.

У мазкур лавозимда аввалроқ президент маслаҳатчиси этиб тайинланган Музаффар Комиловнинг ўрнини эгаллади.

Давронбек Махсудов 2004—2012 йиллар — Ўзбекистон президенти девони ходими, 2012−2018 йиллар — Тошкент ислом университети илмий котиби, магистратура бўлими бошлиги, Исломшунослик кафедраси мудири, 2018−2020 йиллар — Ўзбекистон халқаро ислом академияси Исломшунослик ва ислом цивилизациясини ўрганиш ISESCO кафедраси мудири лавозимига ишлаган.

Тайинловга қадар у Ўзбекистон халқаро ислом академияси биринчи проректори ва Имом Мотуридий халқаро илмий-тадқиқот маркази директори сифатида фаолият юритиб келаётган эди.