Медведев мигрантларнинг рус тилини билмайдиган фарзандларини мактабга қабул қилишни тақиқлашни таклиф қилди

“Миллий тикланиш” партияси етакчиси Алишер Қодиров россиялик сиёсатчининг сўзларига изоҳ берди.

Россия Хавфсизлик кенгаши раиси ўринбосари Дмитрий Медведев давлат миграция сиёсатига бағишланган йиғилишда муҳожирлар рус тилини билмайдиган фарзандларини мактабларга қабул қилишни тўхтатишга чақирди.

“Ижтимоий функтсия жойларида тез-тез муҳокама қилинадиган вазият мавжуд — булар мактаблар ва бошқа таълим муассасалари. Болалар рус тилини билмаса, умумий таълим даражаси зарар кўради. Буни ҳамма билади ва буни тугатиш вақти келди”, — деди у.

Медведев муҳожир оилаларнинг Россияда қолиши масаласига ҳам эътибор қаратди. Унга кўра, агар кимдир мамлакатда бўлса, лекин ишламаса ёки ўқимаса, унда бундай шахс Россия Федерациясини тарк этиши керак.

Унинг таъкидлашича, Бутунроссия жамоатчилик фикрини ўрганиш маркази маълумотларига кўра, аҳолининг 70 фоизи миграция сиёсатини қатъийлаштириш тарафдори.

“Одамлар мигрантлар доиралари, мигрантларнинг алоҳида вакилларининг хунук хулқ-атвори мисолларидан чарчаган. Буни тугатиш керак”, — деди Медведев.

Медведевнинг сўзларига Олий Мажлис Қонунчилик палатаси спикери ўринбосари Алишер Қодиров жавоб қайтарди.

“Болаларга нисбатан кўрсатилаётган бундай шафқатсизлик келажакда рус тилига бўлган муносабатни шакллантиради”, — деб ёзди у Telegram’даги каналида.

Унинг сўзларига кўра, Ўзбекистонда рус тилини оммалаштириш учун самарасиз ажратилаётган маблағлар Россиядаги ўзбекистонлик фуқароларга рус тилини ўргатиш учун фойдалироқ бўлар эди.