Давлат органлари ва ташкилотларининг очиқлик рейтинги янгиланди

Энг паст очиқлик кўрсаткичларни яна Андижон вилояти ҳокимлиги ва Кинематография агентлиги қайд этди. Шу билан бирга, 2023 йилга нисбатан рўйхатда бирорта ҳам вазирлик йўқ эди.

Коррупцияга қарши курашиш агентлиги 2024 йил якуни бўйича давлат органлари ва ташкилотларида амалга оширилаётган ишларнинг самарадорлиги ва натижадорлигини баҳолашга қаратилган «Очиқлик индекси» рейтингини эълон қилди.

Индексни ҳисоблаш 100 баллик шкала бўйича 84 та мезондан иборат саккизта кўрсаткич асосида амалга оширилади: «яхши» (81-100 балл), «қониқарли» (55-80 балл) ва «қониқарсиз» (55 баллдан паст). Натижаларга кўра, биринчи тоифага 50 та, иккинчи тоифага 43 та ва учинчи тоифага 13 та ташкилот киритилган.

Очиқлик бўйича энг паст кўрсаткичларни яна Андижон вилояти ҳокимлиги (28,5 балл) ва Кинематография агентлиги (30,43 балл) қайд этди. Шунингдек, учинчи тоифага Фармацевтика тармоғини ривожлантириш агентлиги, Миллий антидопинг агентлиги, Гидрометеорология хизмати агентлиги, «Асака» АТБ, «Йўлқурилиш» АЖ, Жиззах, Фарғона ва Сирдарё вилоятлари ҳокимликлари, Оила ва хотин-қизлар қўмитаси, Электр энергияси, нефт маҳсулотлари ва газдан фойдаланишни назорат қилиш инспексияси, «РЕС» АЖ киритилди.

Иккинчи тоифага Ташқи ишлар вазирлиги, Соғлиқни сақлаш вазирлиги, Инвестициялар ва ташқи савдо вазирлиги, Маданият вазирлиги, Фавқулодда вазиятлар вазирлиги, Иқтисодиёт ва молия вазирлиги, Uzbekistan Airports, Қишлоқ хўжалиги вазирлиги, «Ўзбектелеком,» Энергетика вазирлиги, Тошкент шаҳар ҳокимлиги ва бошқалар киритилди.

Барча давлат органлари орасида энг юқори очиқлик кўрсаткичлари ОКМК (91,79 балл), Солиқ қўмитаси (90,1), «Ўзавтосаноат» (89,3) га тегишли. Шунингдек, ушбу тоифага Uzbekistan Airways, Адлия вазирлиги, Рақамли технологиялар вазирлиги, Марказий банк, Ички ишлар вазирлиги ва бошқалар кирди.

Қайд этилишича, ўтган йилга нисбатан «яшил» тоифага киритилган давлат муассасалари сони 21 фоизга ошган бўлса, «қизил» тоифага киритилган давлат муассасалари сони 15 фоизга камайган.