Гандбол: Қизларимиз Осиёда учинчи бўлишди, Сарвиноз эса энг яхши ўйинчи деб топилди

Қозоғистоннинг Алмати шаҳрида гандбол бўйича 18 ёшгача бўлган қизлар ўртасида ИХ Осиё чемпионати баҳслари ўз якунига етди. Дунёда пандемик вазият ҳанузгача барҳам топмагани боис мусобақада атиги 5та жамоа қатнашди.

Давравий тизимда ўтказилган ушбу қитъа чемпионатида 2004 йилда туғилган қизларимиздан иборат Ўзбекистон терма жамоаси Осиёда фахрли 3-ўринни қўлга киритди.

Қизларимиз мусобақадаги илк ўйинини Эрон терма жамоасига қарши ўтказишди. Муросасиз кечган баҳсда 44:35 ҳисобида эронлик қизларнинг қўли баланд келди.

Кейинги ўйинларда ҳамюртларимиз Ҳиндистон терма жамоасини 44:41 ҳамда суриялик тенгқурларини 37:28 ҳисобларида мағлуб этишди.

Бироқ, кумуш медаль учун мусобақа мезбонлари Қозоғистон терма жамоасига қарши кечган ўйинда қизларимизга бироз омад етишмади. Шу тариқа улар 3-ўрин ҳамда бронза медалини қўлга киритишди. Эрон У — 18 жамоаси эса олтин медалга сазовор бўлди.

Биз учун қувонарли жиҳатлардан бири, нукуслик қизимиз Сарвиноз Сапарбаева ушбу Осиё чемпионатининг энг яхши ўйинчиси деб топилди ва махсус соврин билан тақдирланди.

Манба: minsport.uz