Давактив собиқ раҳбари Акмалхон Ортиқовнинг иши судга оширилди
Gazeta бу ҳақдаги маълумот Миробод тумани жиноят ишлари бўйича судида кўриб чиқилиши тайинланган жиноят ишлари рўйхатида келтирилганига эътибор қаратди. Суд мажлиси 20 июлга тайинланганди.
Акмалхон Ортиқов бир нечта эпизодлар бўйича айбланмоқда:
- Жиноят кодексининг 167-моддаси 3-қисми «а», «в» ва «г» бандлари (Ўзлаштириш ёки растрата йўли билан талон-торож қилиш: жуда кўп миқдорда; уюшган гуруҳ томонидан ёки унинг манфаатларини кўзлаб; компьютер техникаси воситаларидан фойдаланган ҳолда);
- 206-моддаси 2-қисми «а» ва «б» бандлари (Ҳокимият ёки мансаб ваколати доирасидан четга чиқиш: жуда кўп миқдорда зарар етказган ҳолда ва уюшган гуруҳ манфаатларини кўзлаб);
- 209-моддаси 1-қисми, 2-қисми «а» ва «б» бандлари (Мансаб сохтакорлиги, жумладан, такроран ёки хавфли рецидивист томонидан; уюшган гуруҳ манфаатларини кўзлаб).
Унга 10 йилгача озодликдан маҳрум қилиш жазоси таҳдид солмоқда.
Агентликнинг собиқ раҳбари билан биргаликда қуйидаги шахслар суд олдида жавоб беради:
- Smart Expert Group раҳбари Зиёвиддин Жабборов;
- Veritas баҳолаш компанияси асосчиси ва раҳбари Зуҳриддин Ниғманханов;
- Master Expert баҳолаш компанияси муассиси Равшан Халиткариев;
- Саиджон Саидов;
- Kontinent Imkon Baho баҳолаш компанияси раҳбари Шерматжон Жўраев.
Ушбу беш кишининг барчаси ҳам ўзлаштириш ёки растрата юбориш йўли билан талон-торож қилиш ҳамда мансаб сохтакорлигида айбланмоқда. Жабборов, Халиткариев ва Жўраевга қўшимча равишда 192−11-модда (Нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суистеъмол қилиш) бўйича айблов эълон қилинган.
Акмалхон Ортиқов 2026 йилнинг январь ойида Давлат активларини бошқариш агентлиги раҳбари лавозимидан озод этилганди. Ўшанда Шавкат Мирзиёев «миллиардлаб сўмлик талон-торожликлар» аниқланганини маълум қилганди. Хусусан, давлат раҳбари таъкидлаганидек, Давлат активларини бошқариш агентлиги мансабдор шахслари бозор қиймати камида 250 миллиард сўм бўлган ер участкасини ёпиқ аукционга қўйиб, уни 120 миллиард сўмга сотиб юборган.
Кейинчалик идоранинг собиқ раҳбари қамоққа олинганди.
«Табиий савол туғилади: агар ушбу идораларда кўп йиллар давомида коррупция авж олган бўлса, хавфсизлик масалалари учун масъуллар қаёққа қараган эди?» — деганди президент.
Давлат раҳбари Давлат хавфсизлик хизмати раиси Баҳодир Қурбоновга «Ўзбекнефтгаз» ва Давлат активларини бошқариш агентлиги фаолиятини назорат қилган ходимларнинг масъулиятини кўриб чиқишни топширган.
Gazeta Ўзбекистонда шаффоф бўлмаган хусусийлаштириш ҳолатлари ҳақида бир неча бор хабар берган, йирик активлар жамоатчилик муҳокамасисиз ёки очиқ савдоларсиз янги эгаларига ўтказилаётганини ёзганди. Аввалроқ «Қизилқумцемент», UNG Petro ёнилғи қуйиш шохобчалари тармоғи, Чиноз нефтни қайта ишлаш заводи, Ангрен шина заводи, Фарғона нефтни қайта ишлаш заводи, Perfectum мобил оператори, Узагроэкспортбанк, Uzcard, Деҳқонобод калий заводи ва бошқа компаниялар билан боғлиқ битимлар шаффофлик борасида саволлар уйғотганди.