B2 чет тили сертификатига эга бўлмаган ўқитувчилари билан меҳнат шартномаси бекор қилиниши мумкин

Мактабгача ва мактаб таълими вазирлиги чет тиллари ўқитувчиларига қўйиладиган малака талабларига оид Ҳукумат қарори лойиҳасини жамоатчилик муҳокамасига тақдим этди. Лойиҳага кўра, камида B2 даражасидаги миллий ёки унга тенглаштирилган халқаро сертификатга эга бўлмаган ўқитувчилар билан меҳнат шартномасини бекор қилиш имконияти назарда тутилмоқда.

Ҳужжат жамоатчилик муҳокамасига қўйилган бўлиб, таклиф ва мулоҳазалар 12 августга қадар қабул қилинади.

Маълум қилинишича, хорижий тил ўқитувчилари учун B2 даражасидаги сертификатга эга бўлиш талаби 2021 йилда қабул қилинган Ҳукумат қарори билан жорий этилган. Шу билан бирга, педагогларга ушбу сертификатни олиш учун уч йиллик ўтиш даври берилган.

Кейинги йилларда сертификатга эга бўлмаган ўқитувчиларнинг мурожаатлари инобатга олиниб, талабни бажариш муддати бир неча бор узайтирилди. Аввал муддат 2025 йилга, кейин 2026 йил 1 январгача, сўнг эса 2026/2027 ўқув йили бошлангунга қадар узайтирилди.

Шундай қилиб, 2021 йилдан ҳисоблаганда, мактабларда фаолият юритаётган чет тили ўқитувчиларига камида B2 даражасидаги сертификатни қўлга киритиш учун қарийб беш йил вақт берилган.

Эндиликда мазкур қарор лойиҳаси бўйича жамоатчилик муҳокамаси якунига етгач, унинг якуний таҳрири юзасидан тегишли қарор қабул қилиниши кутилмоқда.