Ўзбекистонликларни Кореяда ишга жойлаштириш бўйича «миграция иши» суди ёпиқ тартибда ўтади

Жиноят ишлари бўйича Бектемир тумани (Тошкент шаҳри) судида пора олиш, жиноий фаолиятдан олинган даромадларни легаллаштириш ва ҳокимиятни суиистеъмол қилишда айбланаётган тўрт нафар шахсга нисбатан жиноят ишини кўриб чиқиш бошланди. Иш Ўзбекистон фуқароларини Жанубий Кореяга ишга юборишни ташкил этишдаги эҳтимолий қонунбузилишлар билан боғлиқ.

Олий суд сайтидаги суд мажлислари жадвалига кўра, суд муҳокамаси 29 июль куни судья Дурдона Дадахонова раислигида бошланган. Дастлабки тергов Бош прокуратура томонидан олиб борилган.

Иш бўйича қуйидагилар судланувчи сифатида жалб этилган:

• Ганчар Уммат ўғли Узақов, у аввал Давлат хавфсизлик хизматида хизмат қилган;
• Алижон Ғаниевич Ашуров. ОАВ хабарларига кўра, у ДХХ ички хавфсизлик бошқармаси бошлиғи лавозимида ишлаган ва 2024 йил ноябрь ойида бу лавозимдан озод этилган;
• Тимур Бадридинович Шариксиев;
• Суҳроб Санжарович Сайфутдинов — ДХХ собиқ ходими ва Ташқи меҳнат миграцияси агентлиги бошлиғининг собиқ биринчи ўринбосари.

Уларнинг барчасига Жиноят кодексининг 210-моддаси 3-қисми «а» ва «б» бандлари (пора олиш), 243-моддаси (жиноий фаолиятдан олинган даромадларни легаллаштириш), шунингдек, 301-моддаси 1-қисми (ҳокимиятни суиистеъмол қилиш, ҳокимият ваколатидан ташқарига чиқиш ёки ҳокимият ҳаракатсизлиги) бўйича айблов эълон қилинган.

Тошкент шаҳар судлари матбуот хизмати маълум қилишича, Алижон Ашуров ва бошқа судланувчиларга оид иш ёпиқ суд мажлисида кўрилмоқда. Бундай қарор иш материалларида шахсий ҳаётга оид ҳамда қонун билан муҳофаза қилинадиган бошқа маълумотлар мавжудлиги сабабли қабул қилинган.

Судлар қўшимча маълумот жараён якунланганидан кейин тақдим этилишини маълум қилди.

Иш ҳақида нималар маълум?

Ҳуқуқ ҳимоячиси Абдураҳмон Ташановнинг маълум қилишича, мазкур иш Ўзбекистон фуқароларини Жанубий Кореяга ишга юборишдаги эҳтимолий қонунбузилишлар билан боғлиқ.

Аввалроқ Бош прокуратура ҳузуридаги Иқтисодий жиноятларга қарши курашиш департаменти Ўзбекистон фуқароларини Жанубий Кореяга ишга юбориш билан боғлиқ эҳтимолий коррупцион схема юзасидан тергов олиб борилаётганини маълум қилган эди.

Тергов талқинига кўра, таркибига Бандлик вазирлиги ҳузуридаги собиқ Ташқи меҳнат миграцияси агентлигининг раҳбар ходимлари, хусусий бандлик агентликлари вакиллари ҳамда бошқа шахслар кирган бўлиши мумкин бўлган гуруҳ 35 нафар фуқародан 263,5 минг доллар олган.

Кейинчалик тергов фуқаролардан расмий тўловлардан ташқари Жанубий Кореяга ишга жойлаштиришга кўмаклашиш учун 7 минг доллардан 12 минг долларгача маблағ ундирилган бўлиши мумкинлигини аниқлаган. Идора баҳосига кўра, олинган маблағларнинг умумий ҳажми тахминан 90 млн долларни ташкил этиши мумкин.

Шунингдек, пул тўлаган, аммо Жанубий Кореяга ишга кета олмаган 600 нафардан ортиқ фуқаро жабрлангани аниқлангани ҳам хабар қилинган.

Бундан ташқари, идора бошқа ҳолатлар ҳақида ҳам маълумот берган. Улардан бирида 230 нафар фуқаро ва 580 минг доллар, яна бирида эса қарийб 1000 нафар одам ва 5,6 млн доллар тилга олинган. Яна бир қатор эпизодлар бўйича маблағларнинг умумий ҳажми 45 млн долларга баҳоланган.

Департамент ушбу уюшган гуруҳ фаолиятидан жабр кўрган фуқароларни 71 233 10 07 рақамли ишонч телефони орқали мурожаат қилишга чақирган ва мурожаатчиларнинг шахси сир сақланишини билдирган.