«Кимни ишдан олмоқчи бўлишса, қишлоқ хўжалигига масъул қилиб қўйишарди». Мирзиёев Қирғизистон ҳукумати билан учрашувда ҳазил қилди

Ўзбекистон президенти Шавкат Мирзиёев 30 июль куни Чўлпонота шаҳрида Қирғизистонга давлат ташрифи доирасидаги расмий кутиб олиш маросимида иштирок этди. Ҳукумат аъзолари билан танишиш чоғида у қишлоқ хўжалигидаги фаолият ҳақида ҳазил қилди ва иқтисодиёт ва тижорат вазирини «энг катта одам» деб атади.

Ўзбекистон президенти Шавкат Мирзиёев ва Қирғизистон президенти Садир Жапаровни расмий кутиб олиш маросими 30 июль куни Чўлпонотадаги «Руҳ Ордо» маданий марказида бўлиб ўтди.

Майдонда икки мамлакат давлат байроқлари кўтарилди, Фахрий қоровул саф тортди. Маросимда 40 нафар этно-жангчи ҳам иштирок этди.

Ўзаро саломлашувдан сўнг давлат раҳбарлари Фахрий қоровул ротаси командирининг ахборотини қабул қилдилар, сўнг Қирғизистон ва Ўзбекистон давлат гимнлари янгради.

Президентлар Фахрий қоровул сафи олдидан ўтдилар. Шавкат Мирзиёев ҳарбий хизматчиларни «Салам аскер!» сўзлари билан қутлади.

Шундан сўнг етакчилар расмий делегациялар аъзолари билан танишдилар.

Қирғизистон Вазирлар маҳкамаси раисининг ўринбосари — сув ресурслари, қишлоқ хўжалиги ва қайта ишлаш саноати вазири Эрлист Акунбеков таништирилаётганда Шавкат Мирзиёев Ўзбекистон ҳукуматидаги фаолиятини эслади.

«Мен ўз вақтида, бош вазир бўлиб турганимда қишлоқ хўжалигига масъул эдим, шунинг учун бу соҳани ва у қандай аҳволда бўлганини яхши биламан. Сизга муваффақият тилайман. Умуман олганда, Совет Иттифоқи даврида кимни ишдан олмоқчи бўлишса, ўшани қишлоқ хўжалигига раҳбар қилиб қўйишарди», — деди у атрофдагиларнинг кулгиси остида.

Садир Жапаров бунга жавобан шундай деди:

«Биз уни ҳали ишдан олмаймиз. Янги тайинладик. Узоқ вақт ишлайди, деб умид қиламан».

Қирғизистон ташқи ишлар вазири Жээнбек Қулубаев билан суҳбат чоғида Ўзбекистон президенти унинг Ўзбекистон ТИВ раҳбари Бахтиёр Саидов билан биргаликда келишувларни тайёрлашга қўшган ҳиссасини эътироф этди.

«Касбдошингиз билан жуда катта иш қилдингизлар. Маромига етказдингизлар. Қийин бўлди, лекин уддаладингизлар. Бу жуда катта меҳнат. Осон бўлмаган бугунги тарихий кунга — иттифоқчилик муносабатларига Садир Нурғожоевич билан биргаликдаги меҳнатимиз эвазига етиб келдик. Келажакда сизга кўп нарса боғлиқ», — деди Шавкат Мирзиёев.

Қирғизистон иқтисодиёт ва тижорат вазири Бақит Сидиқов билан танишар экан, Ўзбекистон президенти уни «энг катта одам» деб атади.

«Уларнинг менталитетида „йўқ“ дейиш ҳар куни бор», — дея ҳазил қилди у.

Садир Жапаров «У ва Молия вазирлиги» деб қўшимча қилди, Шавкат Мирзиёев эса «Иккаласи барибир бир хил», дея жавоб қайтарди.

Қирғизистон энергетика вазири Олтинбек Рисбеков билан танишиш чоғида Шавкат Мирзиёев Қамбарота ГЭСи — 1 лойиҳасини амалга оширишни жадаллаштиришга чақирди.

«Менда янги вазир. У билан бирга ишлашингиз керак. У жуда камтар, соҳанинг одами. Сизлар кўпроқ иш қиласизлар. Қамбаротани тезлаштириш керак», — деди Ўзбекистон президенти.

Олтинбек Рисбеков Ўзбекистон энергетика вазири Шерзод Хўжаев билан таниш эканини маълум қилди ва томонлар ГЭС лойиҳасини «албатта» тезлаштиришларига ишонч билдирди.

Сўнг Шавкат Мирзиёев Қирғизистон Давлат чегара хизмати раиси Абдикарим Алимбоевдан чегара масалалари ҳал этилган-этилмагани билан қизиқди.

«Ҳамма масалаларни ҳал қилдингизлар-а, деярли?» — сўради президент.

«Худди шундай», — деб жавоб берди Абдикарим Алимбоев.

Олдинроқ, 30 июль куни Шавкат Мирзиёев қурилаётган Хитой — Қирғизистон — Ўзбекистон темир йўлини «геосиёсатни бутунлай ўзгартирадиган аср қурилиши» деб атади. У, шунингдек, Ўзбекистон кучли Қирғизистондан манфаатдор эканини ва қўшни мамлакатда олиб борилаётган ислоҳотларни қўллаб-қувватлашда давом этишини таъкидлади.

Садир Жапаров, ўз навбатида, янги келишувлар чегара масалаларини тўлиқ ҳал этиш ва мамлакатлар ўртасидаги ўтказиш пунктлари сонини 15 тадан 30 тагача ошириш имконини беришини маълум қилди.

Музокаралар якунлари бўйича президентлар Ўзбекистон ва Қирғизистон ўртасида Иттифоқчилик муносабатлари тўғрисидаги шартномани имзоладилар. Томонлар, шунингдек, энергетика, савдо ва логистика соҳаларида ҳамкорликни кенгайтиришни муҳокама қилдилар.