Ўзбекистон ва Қирғизистон муносабатларни иттифоқчилик даражасига кўтарди

Олий даражадаги музокаралар якунида Ўзбекистон президенти Шавкат Мирзиёев ва Қирғизистон президенти Садир Жапаров Иттифоқчилик муносабатлари тўғрисидаги шартномани имзоладилар. Бу ҳақда Ўзбекистон президенти матбуот хизмати хабар қилди.

Шунингдек, давлат раҳбарлари ҳузурида икки томонлама ҳужжатларни алмашиш маросими бўлди. Улар қуйидагилар:

1. Ўзбекистон — Қирғизистон давлат чегарасининг участкалари тўғрисида шартнома;
2. «Чашма» булоғидан биргаликда фойдаланиш тўғрисида битим;
3. Давлат ижтимоий суғуртаси ва пенсия таъминоти тўғрисида битим;
4. Олий таълим соҳасидаги кредитларни ўзаро тан олиш тўғрисида битим;
5. Давлат чегараси орқали ўтказиш пунктлари тўғрисидаги ҳукуматлараро битимга ўзгартириш ва қўшимчалар киритиш ҳақида баённома;
6. Фуқароларнинг ўзаро келиб-кетишлари тўғрисидаги ҳукуматлараро битимга баённома;
7. Қирғизистоннинг Иссиқкўл вилояти ҳудудида жойлашган курорт-рекреация хўжалиги объектлари тўғрисидаги битимга баённома;
8. 2026−2027 йилларга мўлжалланган маданият соҳасидаги тадбирлар режаси;
9. 2026−2027 йилларга мўлжалланган туризм соҳасидаги қўшма ҳаракатлар режаси;
10. Қирғизистон Иссиқкўл вилояти Тон туманида жойлашган «Бўстон» пансионати тўғрисида шартнома;
11. 2026−2027 йилларга мўлжалланган агросаноат мажмуаси соҳасидаги амалий чора-тадбирлар режаси,
12. Қирғизистон Мудофаа вазирлиги ва Ўзбекистон Мудофаа вазирлиги ўртасида ҳамкорлик тўғрисида битим.