«Бизга кучли Қирғизистон, кучли қўшни жуда зарур» — Шавкат Мирзиёев

30 июль куни Ўзбекистон ва Қирғизистон муносабатларида тарихий кунга айланди. Бу ҳақда пайшанба куни Қирғизистон президенти Садир Жапаров билан учрашувда қўшни мамлакатда давлат ташрифи билан бўлиб турган президент Шавкат Мирзиёев маълум қилди.

«Бугун тарихий кун. Биз икки томонлама муносабатларни иттифоқчилик даражасига олиб чиқяпмиз. Бу — узоқ, машаққатли ва жиддий меҳнатимиз натижасидир. Ва бугунги тарихий кун икки томонлама муносабатлар тарихида, икки халқ хотирасида абадий қолади», — деди у.

Ўзбекистон раҳбари сўнгги кунларда ўзбек телеканаллари Қирғизистон ва икки томонлама алоқалар ривожи ҳақида батафсил ҳикоя қилганини қайд этди.

«Одамлар сизнинг раҳбарлигингизда эришилаётган муваффақиятларни, Қирғизистондаги ислоҳотларни шунчалик самимият ва илиқлик билан қарши олмоқдаки, улар шунчаки хурсанд бўлишмоқда. Бу икки халқ бир-бирини топиб, улкан муваффақиятларга эришаётгани менга жуда ёқимли», — деди Шавкат Мирзиёев.

Унинг сўзларига кўра, иттифоқчилик муносабатларига ўтиш икки халқнинг янада яқинлашишига асос бўлади.

«Бугун одамлар телевизор орқали муносабатларимизни иттифоқчилик даражасига олиб чиқаётганимизни билишгач, бу икки халқнинг қўллаб-қувватлови ва реал истиқболда янада яқинлашуви бўлади», — деди президент.

Шавкат Мирзиёев Қирғизистонни «Ўзбекистоннинг вақт синовидан ўтган ишончли ҳамкори» деб атади ва қўшни мамлакатда амалга оширилаётган ислоҳотларни бундан буён ҳам қўллаб-қувватлашга тайёрлигини билдирди.

«Ўзбекистон, таъкидлаб ўтганимдек, сизнинг ислоҳотлар дастурингизни бундан буён ҳам ҳар томонлама қўллаб-қувватлайди, чунки бизга кучли Қирғизистон, кучли қўшни жуда зарур», — дея урғулади у.

Ўзбекистон президенти, шунингдек, Қирғизистоннинг барқарор иқтисодий ўсиши, саноат салоҳияти, аҳоли реал даромадларининг ортгани ҳамда кенг кўламли қурилиш ишларини алоҳида қайд этди.

«Қанчалаб кранлар турганини, қанча турар жойлар қурилаётганини кўряпмиз. Одамнинг кўзи қувонади ва биз яқин қўшни, яқин дўст сифатида бундан чин дилдан хурсанд бўламиз ҳамда сизга улкан муваффақиятлар тилаймиз», — деди Шавкат Мирзиёев.

Саммит арафасида ҳукуматлараро комиссия йиғилиши, бизнес-форум, ректорлар форуми ва таҳлилчилар учрашуви бўлиб ўтди. Президент музокаралар якунлари мамлакатлар ўртасидаги дўстлик, яхши қўшничилик ва иттифоқчилик муносабатларини янада мустаҳкамлашга хизмат қилишига ишонч билдирди.

Президент Садир Жапаров ушбу учрашувда Қирғизистон ва Ўзбекистон чегара масалаларини узил-кесил ҳал этадиган ҳамда мамлакатлар ўртасидаги ўтказиш пунктлари сонини икки бараварга — 15 тадан 30 тагача оширадиган ҳужжатларни имзолашини маълум қилди. У, шунингдек, Андижонда Қирғизистоннинг бош консулхонасини очиш бўйича қарор қабул қилинганини билдирди.

Олдинроқ Gazeta президентлар музокаралари ҳақида ёзган эди. Энергетика, савдо ва логистика соҳаларидаги ҳамкорликни кенгайтириш асосий мавзулар қаторида бўлди. Давлат раҳбарлари Ўзбекистон ва Қирғизистон ўртасида Иттифоқчилик муносабатлари тўғрисидаги шартномани имзоладилар. Мамлакатлар делегациялари, шунингдек, бир қатор икки томонлама ҳужжатларни, жумладан, Ўзбекистон-Қирғизистон давлат чегараси участкалари тўғрисидаги шартнома ва Чашма булоғидан биргаликда фойдаланиш тўғрисидаги битимни алмашдилар.

2025 йил якунларига кўра, Ўзбекистон ва Қирғизистон ўртасидаги товар айирбошлаш ҳажми 2024 йилга нисбатан 37 фоизга ошиб, 1,2 млрд долларга етган эди (2024 йилда 874,7 млн доллар бўлган). Жорий йилнинг январь-июнь ойларида эса ўзаро савдо ҳажми 624,6 млн долларни ташкил этди (+45%).