Шотландиядаги Ҳамдўстлик ўйинларидан сўнг Уганда ва Покистон боксчилари ғойиб бўлди

Шотландия полицияси Глазго шаҳрида бўлиб ўтган Ҳамдўстлик ўйинларидан сўнг ўз ватанига қайтиб кетмаган хорижлик спортчилар бўйича тергов ҳаракатларини бошлади. Оммавий ахборот воситаларининг ёзишича, йўқолиб қолган спортчилар Уганда ва Покистон бокс терма жамоаси аъзоларидир.

4 август, сешанба куни кечқурун Шотландия полицияси вакили бу борада расмий маълумот берди:

“Полицияга бир неча спортчининг бедарак йўқолгани ҳақида хабарлар келиб тушди. Ҳозирда ҳолатни ўрганиш бўйича суриштирув ишлари олиб борилмоқда ва Буюк Британия Ички ишлар вазирлиги билан ҳамкорлик йўлга қўйилган”.

Уганданинг NBS Sport нашри хабарига кўра, мамлакатнинг олти кишидан иборат бокс терма жамоасининг тўрт нафар аъзоси жамоанинг қайтиш рейсидан олдин ғойиб бўлган. Улардан бири телеканалга ўзининг бошпана сўраш ниятида эканини маълум қилган.

Шунингдек, Pakistan Today нашрининг ёзишича, покистонлик боксчилардан бири ҳам ватанига қайтувчи самолётга чиқмаган.

Ҳамдўстлик ўйинларидан сўнг спортчиларнинг йўқолиб қолиши билан боғлиқ ҳолатлар сўнгги йилларда тез-тез учраб туради. Эслатиб ўтамиз, 2014-йилги Глазго ўйинларидан бери ушбу нуфузли мусобақалар асосан Австралия ёки Британияда ўтказиб келинмоқда.

Масалан, 2018-йилда Австралиянинг Голд-Кост шаҳрида бўлиб ўтган ўйинлардан сўнг ҳам шундай ҳолат кузатилган. Мусобақа якунланганидан бир ой ўтиб ҳам расмийлар 50 нафар спортчи ва делегация аъзоларини қидираётган эди, яна 190 киши эса бошпана сўраб расман мурожаат қилган.

Маълумот ўрнида айтиш жоизки, Глазгода 11 кун давом этган жорий йилги Ҳамдўстлик ўйинларида дунёнинг 74 та давлатидан келган 3000 га яқин спортчи иштирок этди.

Манба: daryo.uz