АҚШ давлат котиби Марко Рубио октябрда Ўзбекистонга келади

АҚШ давлат котиби Марко Рубио октябрь ойи ўрталарида Самарқандга келадиган 100 дан ортиқ Америка компаниялари вакилларидан иборат делегацияга раҳбарлик қилади. Бу ҳақда 24 сентябрь куни АҚШ президентининг Жанубий ва Марказий Осиё бўйича махсус вакили Сержио Гор маълум қилди.

Горнинг сўзларига кўра, ташриф АҚШ ва Марказий Осиё давлатлари ўртасидаги стратегик шерикликни ривожлантириш, шунингдек, дипломатик ва савдо-иқтисодий ҳамкорликни мустаҳкамлашга қаратилган.

Ташриф давомида Марко Рубио Ўзбекистон, Қозоғистон, Қирғизистон, Тожикистон ва Туркманистон ташқи ишлар вазирлари билан бир қаторда, «C5+1» шаклидаги ТИВ раҳбарлари учрашувида қатнашади.

«Асосий эътибор минтақавий иқтисодий алоқаларни чуқурлаштириш, энергетик хавфсизликни мустаҳкамлаш ҳамда „C5+1“ формати доирасида долзарб минтақавий масалалар бўйича биргаликда ечимлар ишлаб чиқишга қаратилади», — дея таъкидлади Гор.

АҚШ давлат котиби, шунингдек, Марказий Осиёда савдони кенгайтириш, хусусий инвестицияларни рағбатлантириш ва иқтисодий модернизацияни қўллаб-қувватлаш масалаларини муҳокама қилиш учун Ўзбекистон раҳбарияти ва минтақа давлатларидаги ҳамкасблари билан учрашувлар ўтказади.